პრეზიდენტი მზად არის, სესიამდე და სესიის განმავლობაში შეხვედრები გამართოს უმრავლესობასთან, - ამის შესახებ ჟურნალისტებს საქართველოს პრეზიდენტის მრჩეველმა პოლიტიკურ საკითხებში, ფიქრია ჩიხრაძემ განუცხადა.
მისი თქმით, შანსი, რომელზეც ლაპარაკობს საპარლამენტო უმრავლესობა, სწორედ მათ ხელშია იმიტომ, რომ ბევრი დათმობის საპასუხოდ, მათ მცირე დათმობა მაინც უნდა განახორციელონ, რაც ძალიან დიდი სიკეთის მომტანი იქნება ქართული პოლიტიკისთვის.
„დღეს ძალიან მნიშვნელოვანი რამ მოხდა, რადგან პრეზიდენტმა ძალიან სერიოზული თანხმობისა და კომპრომისის დოკუმენტი შესთავაზა უმრავლესობას, მოტივირებული შენიშვნების სახით. ეს ემყარება 20 პოლიტიკური პარტიის მოსაზრებებსა და შეთანხმებებს. კონსტიტუცია მნიშვნელოვანი დოკუმენტია, რომელშიც უნდა იდოს შესანიშნავი დებულებები. სწორედ ამას ვამბობთ, რომ ამ დოკუმენტში, არ დევს შესანიშნავი დებულებები და ბევრი რამ არის საკამათო. კარგი იქნება, რაღაცებზე შევთანხმდეთ და უკეთესი დოკუმენტი შევქმნათ, კონსტიტუცია არ გავწიროთ ერთპარტიულობისათვის. პრეზიდენტის ადმინისტრაციის კარი მუდამ ღიაა დიალოგისთვის. შანსი, რომელზეც ლაპარაკობს საპარლამენტო უმრავლესობა, სწორედ მათ ხელშია იმიტომ, რომ ბევრი დათმობის საპასუხოდ, მათ მცირე დათმობა მაინც უნდა განახორციელონ, რაც ძალიან დიდი სიკეთის მომტანი იქნება ქართული პოლიტიკისთვის. ისტორიული პასუხისმგებლობიდან გამომდინარე, მმართველმა გუნდმა სწორი გადაწყვეტილება უნდა მიიღოს. პრეზიდენტი მზად არის, სესიამდე და სესიის განმავლობაში შეხვედრები გამართოს უმრავლესობასთან“, - განაცხადა ფიქრია ჩიხრაძემ.
