„ევროპული საქართველო“ პრეზიდენტის ვეტოს მხარს დაუჭერს, - ამის შესახებ პარტიის ერთ-ერთმა ლიდერმა გიგა ბოკერიამ განაცხადა.
მისი თქმით, "ევროპული საქართველო" მეტ საკითხზე იყო ვეტოს მომხრე, მაგრამ კარგია, რომ აღნიშნულ 6 საკითხს მაინც დაადო პრეზიდენტმა მარგველაშვილმა ვეტო.
მისივე განცხადებით, "ქართულმა ოცნებამ" უგულვებელყო საერთაშორისო საზოგადოების რჩევები, სამოქალაქო საზოგადოების, ყველას პოზიცია, საკუთარი პარტიული და მათი არაფორმალური ლიდერის, ბიძინა ივანიშვილის ინტერესის გარდა.
"ჩვენ - "ევროპული საქართველო" მეტ საკითხზე ვიყავით ვეტოს მომხრე, მაგრამ კარგია, რომ ამ საკითხებს მაინც დაადო პრეზიდენტმა მარგველაშვილმა ვეტო. ეს ვეტო გამოხატავს სრულ კონსენსუსს საქართველოს მთელი ოპოზიციური სპექტრის, სამოქალაქო საზოგადოების და საერთო ჯამში, ჩვენი საზოგადოების, მთლიანად. სამწუხაროდ, ჩვენ არ გვაქვს დიდი იმედის საფუძველი, რომ საღ აზრს გამოიჩენს "ოცნების" გუნდი, ივანიშვილის გუნდი, მაგრამ მათ კიდევ ერთხელ მაინც უნდა მოვუწოდოთ, რომ ნუ აღმოჩნდებიან მთელი პოლიტიკური სპექტრის, სამოქალაქო საზოგადოების, საბოლოო ჯამში, ქართველი ხალხის საპირისპირო მხარეს. შეგახსენებთ, რომ ეს ის გუნდია, რომელმაც უარი თქვა " ევროპული საქართველოს" ინიციატივაზე, რომ ყველა ამ სადავო საკითხზე ეკითხათ ხალხისთვის აზრი. უგულვებელყო საერთაშორისო საზოგადოების რჩევები, სამოქალაქო საზოგადოების, ყველას პოზიცია, საკუთარი პარტიული და მათი არაფორმალური ლიდერის, ბიძინა ივანიშვილის ინტერესის გარდა. ეს მძიმე დარტყმაა ქვეყნისთვის. ეს ვერ გადაარჩენს მათ საბოლოო ჯამში, პოლიტიკურად, მაგრამ მძიმე დარტყმას აყენებს ქვეყანას, ამიტომ ერთხელაც აქვთ შანსი, რომ ეს მძიმე შეცდომა არ დაუშვან და არ მიაყენონ ზიანი ჩვენს ქვეყანას. ვნახოთ, რა იქნება სხდომაზე. ჩვენი პოზიცია ნათელია, ჩვენ მხარს დავუჭერთ პრეზიდენტის ვეტოს", - განაცხადა გიგა ბოკერიამ.
ცნობისთვის, პრეზიდენტმა საკონსტიტუციო ცვლილებების პროექტის ექვს პუნქტს ვეტო დაადო.
