ჩვენ ძალიან დიდი სამუშაო ჩავატარეთ და დარწმუნებული ვარ, ეს კონსტიტუცია იქნება ძალიან დიდი მემკვიდრეობა, რომლითაც საქართველოში შეუქცევადად დამყარდება დემოკრატიული სისტემა, - ამის შესახებ პრემიერ-მინსიტრმა გიორგი კვირიკაშვილმა ვენეციის კომისიის პლენარულ სხდომაზე საკონსტიტუციო ცვლილებების შესახებ საბოლოო დასკვნის მიღების შესახებ საუბრისას განაცხადა.
მისი თქმით, კომისიის მუშაობის დასრულების შემდგომაც, არაერთი შენიშვნა იქნა გათვალისწინებული და ის ბოლო სამი ნაბიჯი, რომელიც მოთხოვნილი არ არის ვენეციის კომისიის მხრიდან, მაგრამ გადაიდგა - 3%-მდე ბარიერის დაწევა 2020 წლის არჩევნებზე; პარტიული ბლოკების კიდევ ერთხელ, ერთი რაუნდით დაშვება და ბონუსის სისტემაზე მთლიანად უარის თქმა, არის კიდევ ერთი მნიშვნელოვანი ნაბიჯი.
„მინდა, ობიექტურად ვთქვა, რომ კონსტიტუცია, რომელიც ჩვენ მივიღეთ, გახლავთ უპირველეს ყოვლისა ძალიან დიდი შრომის შედეგი. საპარლამენტო გუნდმა, ირაკლი კობახიძის ხელმძღვანელობით, მართლაც ძალიან დიდი სამუშაო ჩაატარა იმისათვის, რომ კონსტიტუცია ყოფილიყო ისეთი, როგორც არის მიღებული.
მთლიანი სამუშაო იყო ერთი დიდი ჩართულობის მაგალითი და მმართველი პარტიის მხრიდან ძალიან ბევრი შემხვედრი ნაბიჯი გადაიდგა კომისიის მუშაობის განმავლობაში“, - განაცხადა გიორგი კვირიკაშვილმა.
მისივე განცხადებით, ეს კონსტიტუცია არის გამსჭვალული კონსენსუსის სულისკვეთებით და არის ძალიან დიდი ნაბიჯი დემოკრატიის განვითარების გზაზე.
„ნუ ვიწინასწარმეტყველებთ, იქნება თუ არა ვეტო. ჩვენ ძალიან დიდი სამუშაო ჩავატარეთ და დარწმუნებული ვარ, ეს კონსტიტუცია იქნება ძალიან დიდი მემკვიდრეობა, რომლითაც საქართველოში შეუქცევადად დამყარდება დემოკრატიული სისტემა. ამიტომ, ვფიქრობ, მმართველმა გუნდმა ძალიან დიდის სამუშაო გასწია და დარწმუნებული ვარ, შემდეგი თაობები ამას ნამდვილად დააფასებენ, რადგან როდესაც ჩვენ ვიყავით ოპოზიციაში, ასეთი რამ, რაც ჩვენ გავაკეთეთ, მმართველი გუნდის მხრიდან წარმოუდგენელი იყო. არც ერთი ახალი ცვლილება არ ემსახურება მმართველი გუნდის ინტერესის განმტკიცებას და გაძლიერებას, მათ შორის მთავრობის მხრიდანაც გადაიდგა ნაბიჯი უნდობლობის პროცედურის გამარტივების კუთხით და ა.შ. ვფიქრობ, ეს კონსტიტუცია არის გამსჭვალული კონსენსუსის სულისკვეთებით და არის ძალიან დიდი ნაბიჯი დემოკრატიის განვითარების გზაზე“, - დასძინა პრემიერმა.
