"აქციაზე პარლამენტის წევრების უფლებები დაირღვა, როდესაც ისინი დედაქალაქის მერიაში არ შეუშვეს", - ამის შესახებ სახალხო დამცველმა უჩა ნანუაშვილმა განაცხადა.
ომბუდსმენის თქმით, დედაქალაქის მერიასთან გამართულ აქციაზე დაკავებულებს დაზიანებები ნამდვილად აღენიშნებათ.
„ის, რომ რამდენიმე დაკავებულს აქვს დაზიანებები კუნთზე და ერთ-ერთ მათგანს ფიქსატორი გაუკეთეს, რომელიც 10 დღის განმავლობაში უნდა ატაროს, მიუთითებს, რომ აქციის დაშლის დროს, მინიმუმ, რამდენიმე დაკავებულს გარკვეული დაზიანება მიადგა და ეს საგამოძიებო ორგანოების მხრიდან არის შესასწავლი.
აქციაზე პარლამენტის წევრების უფლებები დაირღვა, როდესაც ისინი დედაქალაქის მერიაში არ შეუშვეს.
დეპუტატებს აქვთ უფლება, შევიდნენ ყველა ადმინისტრაციულ ორგანოში და მათი უფლება არის დარღვეული", - განმარტა უჩა ნანუაშვილმა.
