ერთ ლარად როდესაც გადავცემთ ქონებას ბიძინა ივანიშვილს და თქვენ ასეთი აქტიურები ხართ, იგივე აქტიურობით ვფიქრობ, უნდა იყოთ როდესაც ერთ ლარად, ათასობით კვ.მ. მიწის ნაკვეთებს გადავცემთ საპატრიარქოს, - ამის შესახებ „რესპუბლიკური პარტიის" სიის პირველმა ნომერმა ხათუნა სამნიძემ გადაცემა „არჩევანში“ ოპოზიციური პარტიის ლიდერების მისამართით განაცხადა.
როგორც ხათუნა სამნიძემ აღნიშნა, თვითმმართველობა საპატრიარქოსაც ემსახურება.
„ბატონმა ნიკამ თქვა, რომ ერთ ადამიანს ემსახურება თვითმმართველობა. ერთ ადამიანს ემსახურება და მეორე სტრუქტურას, ეს არის საპატრიარქო. ერთ ლარად, როდესაც გადავცემთ ქონებას ბიძინა ივანიშვილს და თქვენ ასეთი აქტიურები ხართ, იგივე აქტიურობით ვფიქრობ, უნდა იყოთ როდესაც ერთ ლარად, ათასობით კვ.მ. მიწის ნაკვეთებს გადავცემთ საპატრიარქოს და მილიონობით ლარს ვხარჯავთ პრემიებში ჩინოვნიკებისთვის", - განაცხადა სამნიძემ.
სამნიძე თბილისის მერიასთან გამართულ აქციასაც გამოეხმაურა, სადაც "ნაციონალური მოძრაობის" წევრები და მხარდამჭერები დააკავეს, და აღნიშნა, რომ „ის, რაც ხდებოდა დღეს ქუჩაში, არის თავიდან ბოლომდე "ქართული ოცნების" პასუხისმგებლობა, რადგან მან არ უზრუნველყო ადამიანებთან კომუნიკაცია".
სამნიძის განცხადებით, „ქართულ ოცნებას“ საზოგადოებასთან და ოპოზიციურ პარტიებთან კომუნიკაციის ეშინია. მისივე თქმით, ოქტომბრისთვის, ყველა პარტიამ უნდა შეძლოს ამომრჩევლის მობილიზება და გააქტიურება.
