ე.წ. სამხრეთ ოსეთში ჟენევის საერთაშორისო მოლაპარაკებათა თანათავმჯდომარეების დელეგაცია ჩავიდა, რომელსაც ევროკავშირის წარმომადგენელი პიერ მორელი ხელმძღვანელობს.
დელეგაციის შემადგენლობაში ასევე იმყოფებიან თანათავმჯდომარეები ეუთოს მხრიდან - ბოლატ ნურგალიევი და გაეროს მხრიდან ანტი ტურუნენი, ასევე სამდივნოს წარმომადგენელი რასა ოსტრაუსკაიტე, ევროკომისიის მთავარი პოლიტიკური მრჩეველი ტერი ბეშე და გაეროს ლტოლვილთა საკითხების უმაღლესი კომისრის სამმართველოს წარმომადგენელი კრისტოფ ბიერვიზი.
ე.წ. სამხრეთ ოსეთის ბეჭდვისა და ინფორმაციის კომიტეტის ინფორმაციით, ცხინვალში მყოფი დელეგაცია ჟენევის საერთაშორისო მოლაპარაკებებზე ოსური დელეგაციის ხელმძღვანელს ბორის ჩოჩიევსა და ე.წ. საგარეო საქმეთა მინისტრს მურატ ჯიოევს შეხვდება.
"შეხვედრაში ასევე მიიღებს მონაწილეობას მრჩეველი კონსტანტინე კოჩიევი, ადამიანის უფლებების დამცველი დავიდ სანაკოევი და ბორის ჩოჩიევის მოადგილე მერაბ ჩიგოევი", _ იუწყება კომიტეტი და აღნიშნავს, რომ თანათავმჯდომარეების ვიზიტის პროგრამაში კოლექტიურ ცენტრებში ჩასახლებული დევნილებთან შეხვედრა იგეგმება.
