ერაყის ქურთისტანში დამოუკიდებლობის რეფერენდუმი ტარდება. საარჩევნო უბნები ადგილობრივი დროით დილის 7 საათზე გაიხსნა და 18 საათზე დაიხურება. რეფერენდუმში მონაწილეობის მისაღებად 5,2 მილიონი ამომრჩეველია დარეგისტრირებული. მათ პასუხი უნდა გასცენ კითხვას, სურთ თუ არა, ქურთისტანის რეგიონი და მის ფარგლებს გარეთ მდებარე ქურთული ტერიტორიები დამოუკიდებელი სახელმწიფო გახდეს. რეფერენდუმის შედეგები უბნების დახურვიდან ერთ დღეში გამოცხადდება. პლებისციტის ჩატარებას კატეგორიულად ეწინააღმდეგებოდა ბაღდადი და ანკარა. ქურთებს რეფერენდუმის გადადებისკენ შეერთებული შტატებიც მოუწოდებდა.
