,,პატრიოტთა ალიანსის“ წევრები მოსკოვში 1-ელ ოქტომბერს გაემგზავრებიან და დუმის წევრებს შეხვდებიან. დეპუტატ ადა მარშანიას განცხადებით, შეხვედრაზე განხილვის მთავარი თემები არ შეიცვლება. მისი თქმით, საუბარი გაგრძელდება ნატო-საქართველო-რუსეთის ფორმატზე, რაც თავად ნატო-ს მიერ არ არის უკუგდებული.
„მოსკოვში იმისთვის ჩავდივართ, რომ ახლო მომავალში მაინც ჩავიდეთ სოხუმსა და ცხინვალში. ეს არის ჩვენი სტრატეგია და პოლიტიკა. მოსკოვში ჩავდივართ იმისთვის, რომ იმ უმძიმეს ვითარებაზე ვისაუბროთ, რაც ჩვენს საზღვრებზე სუფევს”, - აღნიშნა მარშანიამ.
მისივე თქმით, ოპონენტებს საკითხის მიმართ არასახელმწიფოებრივი მიდგომა თავად აქვთ.
„არასახელმწიფო ქმედებად რომ აფასებენ, ამიტომ მათ არასახელმწიფოებრივი მიდგომა აქვთ. ოკუპირებულია ჩვენი რეგიონები და დიპლომატიური ურთიერთობები არ გვაქვს. იმისათვის, რომ მცოცავი ოკუპაცია შევწყვიტოთ, ამიტომ მოსკოვში ჩავდივართ. ტყუილად არცერთი ჩასვლა არ იქნება განხორციელებული”, - აღნიშნა დეპუტატმა.
მოსკოვში ჩასვლას გეგმავენ ადა მარშანია, გიორგი ლომია, ნატო ჩხეიძე და დავით თარხან-მოურავი. მარშანიას განცხადებით, მომავალში დელეგაციის შემადგენლობა გაიზრდება.
