მამა გიორგის იქ [გერმანიაში] ფული უნდა ჩაეტანა პატრიარქის თანმხლები პირების, მათ შორის დაცვის წევრების ხარჯების უზრუნველსაყოფად, - ამის შესახებ დეკანოზ გიორგი მამალაძის ადვოკატმა პაატა მეხრიშვილმა "ჯი-ეიჩ-ენ"-ს განუცხადა.
მისი თქმით, მეუფე დიმიტრი შიოლაშვილმა დეკანოზს დაურეკა და გერმანიაში რაც შეიძლება სწრაფად ჩასვლას სთხოვა.
"დაცვის წევრებმა, მათ შორის, იოსებ ელიზბარაშვილმა განაცხადა რომ ისინი გერმანიაში მოულოდნელად გაემგზავრნენ. მამა გიორგის იქ ფული უნდა ჩაეტანა პატრიარქის თანმხლები პირების, მათ შორის დაცვის წევრების ხარჯების უზრუნველსაყოფად. ამის გამო მან ბანკიდან სესხიც გამოიტანა და თან ჰქონდა კიდეც. იგივეს ადასტურებს ფარული კადრები, საიდანაც ირკვევა რომ მას მეუფე დიმიტრი შიოლაშვილმა დაურეკა, ის გერმანიაში რაც შეიძლება სწრაფად ჩასვლას სთხოვდა", - განაცხადა პაატა მეხრიშვილმა.
ცნობისთვის, ე.წ. ციანიდის საქმეზე განაჩენის გამოცხადებამდე ერთი დღით ადრე, რუსთავი2-მა მოიპოვა ახალი კადრები. ვიდეო წარმოადგენს სრულ ვერსიას იმ ფარული ჩანაწერების, რომელიც პროკურატურამ გამოაქვეყნა. ახალი კადრების მიხედვით ცნობილი ხდება, რომ დეკანოზი გიორგი მამალაძე გერმანიაში საკუთარი ინიციატივით არ გამგზავრებულა და ის მეუფე დიმიტრიმ დაიბარა.