თურქეთის ლიდერი მიანმარის ხელისუფებას მუსლიმების დევნაში ადანაშაულებს. რეჯეფ თაიფ ერდოღანი საერთაშორისო საზოგადოებას ოფიციალურ ნეიპიდოზე ზეწოლის გაძლიერებისკენ მოუწოდებს.
„ეს გენოციდია. მიანმარში ძალადობის მსხვერპლნი ხდებიან არამხოლოდ როჰინჯები, არამედ სხვა ეთნიკური და რელიგიური ჯგუფებიც. ვინც ამ სისასტიკეზე ხმას არ იმაღლებს, ის ძალადობის მონაწილეა,“-აღნიშნა ერდოღანმა.
ვითარება მუსლიმებით დასახლებულ რაკჰაინის რეგიონში 25 აგვისტოს გამწვავდა, მას შემდეგ, რაც არკან როჰინჯას ხსნის არმიის მებრძოლებმა მიანმარის სამხედრო და პოლიციის ბლოკპოსტებზე თავდასხმები მოაწყვეს. სახელისუფლო ძალებმა რეგიონზე კონტროლის დასამყარებლად დამატებითი ძალები გაგზავნეს. არაოფიციალური მონაცემებით, როჰინჯებსა და სამთავრობო ძალებს შორის შეტაკებებს 400-ზე მეტი ადამიანი ემსხვერპლა. ბოლო ერთი კვირის განმავლობაში რაკჰაინი 40 ათასზე მეტმა ადამიანმა დატოვა.
