შესაძლოა, „ფე-ეს-ბეს“ გენერლად და პუტინის საუკეთესო მეგობრად გამომაცხადონ, - ამის შესახებ საქართველოს ყოფილი პრეზიდენტი, ოდესის ყოფილი გუბერნატორი მიხეილ სააკაშვილი აცხადებს. მისი პარტისს პრესსამსახურის ცნობით,
უკრაინის ხელისუფლება უკრაინაში სააკაშვილის დაბრუნებამდე პროვოკაციებს ამზადებს.
„ისინი რაღაც პროვოკაციებს მიმზადებენ. არ გამიკვირდება თუ მომდევნო დღეებში „ფე-ეს-ბეს“ აგენტად ან გენერლად, პუტინის საუკეთესო მეგობრად გამომაცხადებენ“, - აცხადებს მიხეილ სააკაშვილი.
მისივე თქმით, უკრაინის ხელისუფლებამ იუსტიციის სამინისტროს დაავალა მისი საქართველოში ექსტრადირების საკითხი შეისწავლონ. მიხეილ სააკაშვილმა განაცხადა, რომ უკრაინის ხელისუფლება მას ემუქრება, გარდა ამისა პოლონეთის ხელისუფლებაზეც წნეხს ახდენს.
„ვფიქრობ, უფრო გონივრული იქნებოდა მომცენ შესაძლებლობა ყოველგვარი პროვოკაციების გარეშე მივიდე უკრაინულ სასამართლოში, რომ თავი დავიცვა, ასევე შევქმნა პრეცედენტი იმისა, რომ პრეზიდენტის განკარგულებების გასაჩივრება შეიძლება და თუ მართალი ხარ, შეიძლება კიდევაც გაიმარჯვო“, - აცხადებს სააკაშვილი.
