რუსული მედია ქართულ სკოლებში ისტორიის ახალი სახელმძღვანელოს "რუსული ოკუპაციის 200 წელი" შემოღებას ეხმაურება. "ახალი სასწავლო წლიდან ქართულ სკოლებში გაჩნდება ისტორიის ახალი წიგნი სახელწოდებით "რუსული ოკუპაციის 200 წელი", _ წერს გაზეთი "ვრემია ნოვოსტეი".
"ქართული სახელმძღვანელოებით ქართველი ბავშვებისათვის იწყება "რუსული ოკუპაციის" შესახებ მითის ჩანეგრვა", _ წერს მეორე, ანტიქართული განწყობებით ცნობილი რუსული გაზეთი "კომსომოლსკაია პრავდა.
"უკვე პირველი კლასის სახელმძღვანელოში საქართველოს სახელმწიფოს დამოუკიდებლობის აქტზეა საუბარი, რომელიც 1991 წლის 9 აპრილს მიიღეს. იქ კონკრეტულად ნათქვამია: 1921 წლის თებერვალ-მარტში საბჭოთა რუსეთმა შეიარაღებული აგრესიის გზით საქართველოს სახელმწიფოს ოკუპაცია განახორციელა, რასაც შემდგომ ფიზიკური ანექსია მოჰყვა. საქართველოს მთელს ყოფნას საბჭოთა კავშირში თან სდევდა სისხლიანი ტერორი და რეპრესიები... საქართველოს წინააღმდეგ ფარული ბრძოლა ახლაც გრძელდება, მისი მიზანია საქართველოს შეჩერება თავისუფლებისა და დემოკრატიის გზაზე", _ წერს "კომსომოლსკაია პრავდა" და იქვე აღნიშნავს, რომ ქართულ სახელმძღვანელოებში ასევე საუბარი მიდის რუსულ ოკუპაციაზე...
"პატარა ამაყმა საქართველო _ წერენ სახელმძღვანელოს ავტორები _ წარმატებით ებრძოდა თურქებს, სპარსელებს და სხვა დამპყრობლებს, მაგრამ რუსულ იმპერიულ ძალებთან გამკლავება ვერ შეძლო", _ წერს გაზეთი და ამ საკითხზე რუსეთის დუმის დეპუტატს, რუსეთის საგარეო საქმეთა სამინისტროსთან არსებული მოსკოვის საერთაშორისო საქმეთა სახელმწიფო ინსტიტუტის პროფესორს ვლადიმერ მედინსკის მიმართავს, რომელიც თავის მხრივ აცხადებს, რომ "ისტორია მეძავ ქალად გამოჰყავთ".
"ქართველმა ბავშვებმა არ იციან, რომ რუსეთის იმპერიამ მათი წინაპრები თავის შემადგენლობაში მხოლოდ მას შემდეგ მიიღო, რაც ქართველმა მეფეებმა ეს დაჯინებით მოითხოვეს და ამ თხოვნით დაახლოებით 12 წერილი მაინც გამოაგზავნეს. და ეს მოხდა იმის შემდეგ რაც თურქებმა და სპარსელებმა ქართველი ერი გადაშენების პირას მიიყვანეს. არ შეიძლება ისტორიისგან მეძავი ქალის გამოყვანა", _ აცხადებს ვლადიმერ მედინსკი.
