"ჩვენ გვჭირდება ძლიერი ევროპა, რომელიც მთლიანად არ იქნება დამოკიდებული რუსულ გაზზე და აშშ-სთან ერთად შეძლებს რუსეთს საქართველოს დანაწევრებაში შეეწინააღმდეგოს", - ამის შესახებ "ქრისტიან-დემოკრატების" ლიდერმა გიორგი თარგამაძემ დღეს, პარლამენტში რიგგარეშე სესიაზე განაცხადა.
"ჩვენ კატეგორიულად ვეწინააღმდეგებით ამ ინიციატივას, რომელიც პარლამენტში არის შემოსული და მიგვაჩნია, რომ ეს არ არის მხოლოდ ეკონომიკური საკითხი, რადგან საქმე ეხება ქვეყნის ენერგეტიკულ უსაფრთხოებას და პოლიტიკას. მთელი ევროპა და მსოფლიო შეთანხმდა იმაზე, რომ რუსეთის ფედერაცია ენერგორესურსებს და ენერგოტრანზიტის შესაძლებლობებს პოლიტიკური მიზნების განსახორციელებლად იყენებს. ჩვენ გვჭირდება ძლიერი ევროპა, რომელიც არ იქნება მთლიანად რუსულ გაზზე დამოკიდებული, იმისთვის, რომ ევროპამ შესძლოს ამერიკის შეერთებულ შტატებთან ერთად კონსოლიდირებული პოზიციით უფრო მყარი და თანამიმდევრული წინააღმდეგობა გაუწიოს მოსკოვს დღევანდელი პოლიტიკური ელიტას გეგმებს განხორციელებაში, რომელიც ჩვენი ქვეყნის დაქუცმაცებას სახელმწიფოებრიობის მოსპობას ითვალისწინებს", - განაცხადა გიორგი თარგამაძემ.
მისივე თქმით, ამ პოლიტიკური საფრთხეებიდან გამომდინარე, ჩნდება რისკები, რომ მაგისტრალური გაზსადენი აღმოჩნდება ვითომდა კომერციული სუბიექტების ხელში, რომლის უკან აუცილებლად რუსეთის ფედერაციის პოლიტიკური ინტერესები იდგება.
"დღევანდელ მსოფლიოში განსაკუთრებულ სირთულეს არ წარმოადგენს, რომ მეორე, მესამე ე.წ. გადამზღვევი ქვეყნების, მხარეებს და კომერციული ორგანიზაციები ისე შეინიღბოს ნებისმიერი პირველი ქვეყნის პოლიტიკური-ეკონომიკური ინტერესები სხვა ქვეყნის ტერიტორიაზე, რომ ამის გამგები არავინ არ იქნება. ამიტომ ჩვენ ვამბობთ, თუ მართლაც გინდათ, რომ ყველა ეს რისკი გამოვრიცხოთ აუცილებელია ერთი უწყინარი ფრაზა ჩავწეროთ ამავე კანონში, რომ 51% ყველა შემთხვევაში და ყოველთვის დარჩება სახელმწიფოს ხელში. ხელისუფლება ბოლომდე აიღებს პასუხისმგებლობას თავის თავზე, რომ მაგისტრალური გაზსადენი რუსეთის ხელში არ აღმოჩნდება", - განაცხადა თარგამაძემ.
მისივე შეფასებით, ამ მაგისტრალის ხელში ჩაგდების სურვილი ერთადერთ ქვეყანას - რუსეთს აქვს, რადგანაც ამ გზით ის აისრულებს თავის ოცნებას და ირანის იაფი გაზს და ცენტრალური აზიის გაზსა სომხეთის მეშვებით ერთიანი ინფრასტრუქტურაში მოაქცევს. ირანი მოექცევა ამ შემთხვევაში რუსეთის ერთიანი გაზის ტრანსპორტირების ინფრასტრუქტურის სქემაში.
ამასთან, თარგამაძის განცხადებით, გაზსადენის მაგისტრალის პრივატიზებით დამატებით სამუშაო ადგილები შეიქმნება და ეკონომიკის წახალისებასთან დაკავშირებით არც მთავრობას და არც უმრავლესობას ეკონომიკური დასაბუთება არ წამოუდგენია, გარდა სიტყვიერი განცხადებებისა.
"მთავრია, რომ რუსეთს ხელის არ უნდა შევუწყოთ იმაში, რომ პოლიტიკური დიქტატის ქვეშ ამყოფოს ევროპა. ამიტომ ჩვენი აღნიშნულ საკითხზე ჩვენი მთავარი არგუმენტია ქვეყნის უსაფრთხოების ინტერესები და ქართული სახელმწიფოებრიობა. ამ გადაწყვეტილებში ვხედავთ საფრთხეს, რომ დიდი რისკის ქვეშ შეიძლება დადგეს პერსპექტივაში ჩვენი ქვეყნის უსაფრთხოება და დამოუკიდებლობა. მოგიწოდებთ, რომ კანონში ერთი წინადადება ჩაწეროთ, რომელიც გამორიცხავს იმ ეჭვებს, რაც შეიძლება გაჩნდეს ან უკვე არსებობს საქართველოს მთავრობის სამომავლო განზრახვებთან დაკავშირებით", - განაცხადა თარგამაძემ.
შეგახსენებთ, რომ მაგისტრალურ გაზსადენის პრივატიზების შესაძლებლობა მას შემდეგ გაჩნდება, რაც პარლამენტი "სახელმწიფო ქონების შესახებ" კანონში შესატან ცვლილებების დაამტკიცებს. თუმცა როგორც დღეს საბიუჯეტო და რეგიონალური განვითარების კომიტეტების გაერთიანებულ სხდომაზე მთავრობის საპარლამენტო მდივანმა გია ხუროშვილმა განაცხადა, მთავრობა აღნიშნული კანონპროექტის ექსპერტიზას აკეთებს.
"მთავრობა ამ კანონპროექტის დარგობრივ ექსპერტიზას აკეთებს და მე გთხოვთ რომ მეორე მოსმენა არ გაიმართოს მანამ ვიდრე ამ ექსპერტიზის პასუხები არ გვქნება" - განაცხადა გია ხუროშვილმა.
