გაზეთი " Wall Street Journal "-ი წერს, რომ ავსტრიის პოლიცია საქართველოს პრეზიდენტის წინააღმდეგ გასულ წელს მიმდინარე საპროტესტო აქციების დაფინანსებაში, ევროპაში მოქმედი ერთ-ერთი კრიმინალური დაჯგუფების მონაწილეობის საკითხს იძიებს. ინფორმაციას ამის შესახებ გაზეთი დღეს აქვეყნებს.
ვენის პოლიციის ანგარიშის თანახმად, რომელიც აღნიშნულ გამომცემლობას ხელში ჩაუვარდა, ეს დანაშაულებრივი დაჯგუფება საქართველოში ბაზირდება და ფულს ქურდობიდან, შანტაჟიდან და ფულის გათეთრებიდან იღებს, პირველ რიგში დასავლეთ ევროპის ქვეყნებიდან.
ანგარიშში არის გამოთქმული ვარაუდი იმის შესახებ, რომ ავსტრიაში მაცხოვრებელმა ერთმა ქართველმა ბიზნესმენმა შეაგროვა ფული, რომლითაც დაფინანსდა 2009 წლის დასაწყისში მიმდინარე საპროტესტო აქციები.
"დაჯგუფების მიზანი, იყო _ მცდელობა კორუფციისა და დაშინების გზით ხელისუფლებიდან ჩამოეშორებინათ საქართველოს პრეზიდენტი _ საქართველოს ეკონომიკასა და პოლიტიკაზე გავლენის მოხდენისა და საქართველოში სისხლის სამართლის პასუხისმგებლობისგან საკუთარი თავის გათავისუფლების მიზნით", _ ციტირებს გაზეთი ანგარიშს.
46 გვერდიან ანგარიშში ამ დაჯგუფებას ეწოდება "ქართული ორგანიზებული დანაშაულებრივი ორგანიზაცია". ანგარიში, ძირითადად სატელეფონო მოსმენებზეა დაფუძნებული.