უკრაინულმა მედიამ პრეზიდენტ პოროშენკოს იმ განკარგულების ფოტო გამოაქვეყნა, რომლის მიხედვითაც მიხეილ სააკაშვილს მოქალაქეობა ჩამოართვეს. Obozrevatel-ი არ აკონკრეტებს, საიდან მოიპოვა დოკუმენტის ფოტოასლი.
დოკუმენტის მიხედვით, სააკაშვილის გარდა მოქალქეობა კიდევ 7 პირის ჩამოართვეს. ამასთან, სააკაშვილისთვის მოქალაქეობის ჩამორთმევის კონკრეტული საფუძველი მითითებული არ არის. დოკუმენტში მხოლოდ ზოგადი ინფორმაციაა უკრაინის კონსტიტუციის და მოქალაქეობის კანონის შესახებ.
ოდესის ყოფილი გუბერნატორის მიხეილ სააკაშვილის ადვოკატები უკრაინის მოქალაქეობის ჩამორთმევის გადაწყვეტილების გასაჩივრებას აპირებენ. სააკაშვილის ადვოკატმა ნიკოლაი ნიდილკომ გასულ დღეებში განაცხადა, რომ ამ ეტაპზე უკრაინის პრეზიდენტის ოფიციალური ბრძანება მიხეილ სააკაშვილის მოქალაქეობის ჩამორთმევაზე არ არსებობს.
უკრაინის პრეზიდენტის ადმინისტრაციის განმარტება აღნიშნულ საკითხზე ,,უკრაინსკაია პრავდამ“ გამოაქვეყნა.
„სახელმწიფო საიმიგრაციო სამსახურის წარდგენით, რომელმაც უტყუარი ფაქტები წარადგინა მოქალაქეობის განაცხადის გაფორმებისას არასწორი ინფორმაციის მოწოდების შესახებ, მოქალაქეობის საკითხის შესახებ კომისიამ გადაწყვიტა მხარი დაეჭირა მიხეილ სააკაშვილისთვის მოქალაქეობის ჩამორთმევას და პრეზიდენტს რეკომენდაციით მიმართა შესაბამისი გადაწყვეტილება მიეღო. პერსონალური მონაცემების შესახებ კანონმდებლობის თანახმად, აღნიშნული განკარგულება არ ექვემდებარება გასაჯაროებას, ვინაიდან კონფიდენციალურ ინფორმაციასა და პერსონალურ მონაცემებს შეიცავს“, - განმარტავენ ადმინისტრაციაში.
