საქართველოს ყოფილი პრეზიდენტის, მიხეილ სააკაშვილის ადვოკატები უკრაინის მოქალაქეობის ჩამორთმევის გადაწყვეტილების გასაჩივრებას აპირებენ. , ,,საზოგადოებრივთან“ საუბარში სააკაშვილის ადვოკატმა ნიკოლაი ნიდილკომ განაცხადა, რომ ამ ეტაპზე უკრაინის პრეზიდენტის ოფიციალური ბრძანება მიხეილ სააკაშვილის მოქალაქეობის ჩამორთმევაზე არ არსებობს.
„ადვოკატთა ჯგუფმა უკვე დავიწყეთ მუშაობა ამ ინფორმაციის გადასამოწმებლად, უამრავი მიმართვა მოვამზადეთ სხვადასხვა ინსტანციისთვის, მათ შორის ჩვენ მივმართეთ გენერალურ პროკურატურას, პრეზიდენტის ადმინისტრაციას. ჩვენ გავრცელებული ინფორმაციის დადასტურებას ველოდებით. უკვე მზადდება სარჩელები, მივმართავთ სასამართლოს, რათა პრეზიდენტის საიმიგრაციო სამსახურისა და გენერალური პროკურატურის ეს ქმედება უკანონოდ გამოცხადდეს, რადგან მთელი პროცედურა მიხეილ სააკაშვილისა და მისი ადვოკატების ჩართულობის გარეშე მიმდინარეობდა. ეს ჩვენი შეფასებით, პოლიტიკური დაკვეთაა და მაღალჩინოსნებმა საკუთარი უფლებამოსილება ბოროტად გამოიყენეს“, - განაცხადა სააკაშვილის ადვოკატმა.
უკრაინის პრეზიდენტის ადმინისტრაციის განმარტება აღნიშნულ საკითხზე დღეს ,,უკრაინსკაია პრავდამ“ გამოაქვეყნა.
„სახელმწიფო საიმიგრაციო სამსახურის წარდგენით, რომელმაც უტყუარი ფაქტები წარადგინა მოქალაქეობის განაცხადის გაფორმებისას არასწორი ინფორმაციის მოწოდების შესახებ, მოქალაქეობის საკითხის შესახებ კომისიამ გადაწყვიტა მხარი დაეჭირა მიხეილ სააკაშვილისთვის მოქალაქეობის ჩამორთმევას და პრეზიდენტს რეკომენდაციით მიმართა შესაბამისი გადაწყვეტილება მიეღო. პერსონალური მონაცემების შესახებ კანონმდებლობის თანახმად, აღნიშნული განკარგულება არ ექვემდებარება გასაჯაროებას, ვინაიდან კონფიდენციალურ ინფორმაციასა და პერსონალურ მონაცემებს შეიცავს“, - განმარტავენ ადმინისტრაციაში.
