აშშ განაგრძობს ევროკავშირის სადამკვირვებლო მისიასთან, სხვა მრავალმხრივ მექანიზმებსა და მთავრობებთან მუშაობას ე.წ. სამხრეთ ოსეთისა და აფხაზეთის რეგიონებში კონფლიქტების მშვიდობიანად მოსაწესრიგებლად. ნათქვამია აშშ-ს სახელმწიფო დეპარტამენტის მიერ გამოქვეყნებულ ანგარიშში, რომელიც მსოფლიოში დემოკრატიის განვითარების ხელშეწყობას ეხება.
ანგარიშის თანახმად, ამ პროცესში აშშ საქართველოს სუვერენიტეტისა და ტერიტორიული მთლიანობის დათმობას არ აპირებს და ხელს შეუწყობს იძულებით გადაადგილებული პირების დაბრუნებას საკუთარ სახლებში.
აშშ ასევე ხელს შეუწყობს ქვეყანაში დემოკრატიული რეფორმების და სამართლიანი არჩევნების პროცესს, კანონის უზენაესობას, სასამართლოსა და მედიის თავისუფლებას, სამოქალაქო საზოგადოებისა და პოლიტიკური პლურალიზმის განვითარებას, _ აღნიშნულია ანგარიშში.
რუსეთთან მიმართებაში სახელმწიფო დეპარტამენტი ყურადღებას ამახვილებს პოლიტიკური ინსტიტუტების ანგარიშვალდებულების განვითარებაზე, სამოქალაქო საზოგადოების გააქტიურებაზე, დამოუკიდებლობისა და კანონის უზენაესობის ხელშეწყობაზე.
დოკუმენტის მიხედვით ქვეყანაში დაბალია პოლიტიკური აქტივობა. ხელისუფლების მიერ კი სამოქალაქო საზოგადოებასა და დამოუკიდებელ მედიაზე შეზღუდვების დაწესება კი დემოკრატიის განვითარებას აფერხებს.
მოხსენება ყურადღებას ამახვილებს ქვეყანაში კორუფციის დონის შემცირების აუცილებლობაზე
ანგარიში მსოფლიოს 106 ქვეყანას მოიცავს.
