ოზურგეთში უბედური შემთხვევა მოხდა 38 წლის, 2 შვილის დედა ოზურგეთი სამშობიაროს ფანჯრიდან გადმოხტა და დაიღუპა.
ამ შემთხვევამდე რამდენიმე დღით ადრე, ოზურგეთის რაიონში სოფელ სილაურში მაცხოვრებელი ოზურგეთის სამშობიაროში სასწრაფო დახმარების მანქანით გადაიყვანეს.
მთავარი ექიმის განცხადებით, მას ძლიერი სისხლდენა აღენიშნებოდა. მკურნალობის შემდეგ კი გაირკვა, რომ ქალი ნამშობიარები იყო, თუმცა იგი ბავშვის გაჩენას კატეგორიულად უარყოფდა.
საეჭვო ვითარების გასარკვევად მედპერსონალმა ეს ფაქტი პოლიციას აცნობა. სამართალდამცავებმა კი ქალის სახლში გარდაცვლილი ახალშობილი იპოვეს. ექსპერტიზის შედეგად დადგინდა, რომ ბავშვი ჯანმრთელი დაიბადა.
გავრცელებული ინფორმაციით, ბავშვის გაჩენის წინააღმდეგი ქალის ოჯახი იყო, ამიტომ მან გადაწყვიტა მალულად, სახლის პირობებში ემშობიარა. ჯანმრთელობის მდგომარეობის გაუარესების გამო კი მისი საავადმყოფოში გადაყვანა გახდა აუცილებელი.
ექიმების განცხადებით, მისი ჯანმრთელობის მდგომარეობა დამაკმაყოფილებელი იყო. თავის მოკვლა მან მას შემდეგ გადაწყვიტა, რაც საქმეში პოლიცია ჩაერთო.
