აფხაზი სეპარატისტები დღეს განმუხურის მიმართულებით ცეცხლის გახსნის ფაქტს კატეგორიულად უარყოფს. გალის რაიონის ე.წ. მილიციის უფროსი ვადიმ ღვინჯია აცხადებს, რომ აფხაზეთის მხრიდან ქართული დასახლებული პუნქტის დაცხრილვის ფაქტი სიმართლეს არ შეესაბამება.
"არავითარი ცეცხლი არ გახსნილა და ეს ინფორმაცია უსაფუძვლოა", _ აცხადებს ღვინჯია. ამავე დროს, აფხაზეთში რუსეთის ფედერალური უსაფრთხოების სასაზღვრო სამსახურის პრესსამსახურის უფროსი ვასილი მალაევი აცხადებს, რომ გალის რაიონის სოფელ ოტობაიაში განლაგებულ სასაზღვრო პუნქტზე დღეს დილით 03:00 და 04:00 საათებში სროლა ისმოდა.
"ცხადია, რომ სროლა საქართველოს ტერიტორიიდან მიდიოდა, აფხაზურ მხარეს კი ამ დღე-ღამემ მშვიდად ჩაიარა. არავითარი ინციდენტი დაფიქსირებული არ არის", _ აცხადებს მალაევი.
შეგახსენებთ, რომ დღეს დილით, განმუხურში განლაგებული საგუშაგოს აფხაზური მხრიდან, კერძოდ სოფელ ოტობაიადან დაიცხრილა. ცეცხლი 10 წუთის განმავლობაში მიმდინარეობდა. შედეგად დაიჭრა ფეხში ერთი ქართველი პოლიციელი დავით ბეჭვაია, რომელიც ზუგდიდის საავადმყოფოში იქნა გადაყვანილი.
