აჭარის ფინანსთა და ეკონომიკის სამინისტრო სასოფლო-სამეურნეო მიწას იჯარით გასცემს. როგორც სააგენტო "ჯი-ეიჩ-ენს" სამინისტროდან აცნობეს, 5-წლიანი იჯარით გაიცემა ხელვაჩაურის მუნიციპალიტეტში, სოფ. წინსვლაში მდებარე სასოფლო-სამეურნეო დანიშნულების მიწის ნაკვეთი და მასზე განლაგებული შენობა-ნაგებობები.
აღნიშნული ობიექტის იჯარით გაცემა 5 ივლისისათვის დაგეგმილ აუქციონზე იგეგმება. აუქციონის პირობების თანახმად, მყიდველი ვალდებულია ქონების იჯარით სარგებლობაში გადაცემიდან ექვსი თვის შემდეგ 50 სამუშაო ადგილი შექმნას. იმავდროულად ქონების პრივატიზების შემთხვევაში, მეიჯარე უფლებამოსილია ყოველგვარი კომპენსაციებისა და ჯარიმის გარეშე ვადამდე შეწყვიტოს საიჯარო ხელშეკრულება.
საიჯარო ქირის გადახდა იწარმოებს ყოველთვიურად, თანაბარწილად ყოველი თვის 5 რიცხვამდე.
