ნიგერიის პრეზიდენტი ჯონათან გუდლაქი საკუთარი ქვეყნის საფეხბურთო ნაკრებს 2 წლის განმავლობაში საერთაშორისო ტურნირებზე ასპარეზობას უკრძალავს. აღნიშნული გადაწყვეტილება პრეზიდენტმა მიმდინარე მუნდიალზე ნიგერიელების ცუდი ასპარეზობის გამო მიიღო. ამის შესახებ უცხოური სპორტული მედია იუწყება.
გუდლაქმა ნიგერიელები ქვე-ჯგუფში ვერც ერთი მატჩის მოგების გამო მკაცრად გააკრიტიკა და აღნიშნა, რომ მომდევნო 2 წლის განმავლობაში ნიგერიის ნაკრები საერთაშორისო ტურნირებზე აღარ ითამაშებს. მისი თქმით, ეს პერიოდი გუნდის რეორგანიზაციას მოხმარდება.
შეგახსენებთ, რომ ცოტა ხნის წინ, ფიფას პრეზიდენტმა, იოზეპ ბლატერმა საფრანგეთის პრეზიდენტი ნიკოლა სარკოზი საფრანგეთის საფეხბურთო ნაკრების საქმეებში უხეშად ჩარევის გამო მკაცრად გააკრიტიკა და აღნიშნა, რომ "ფაქტის განმეორების შემთხვევაში საფრანგეთის საფეხბურთო ასოციაცია მკაცრად დაისჯება". ამ ეტაპზე უცნობია თუ რა რეაქცია ექნება ფიფას ნიგერიის პრეზიდენტის გადაწყვეტილებაზე.
