თურქეთის პრეზიდენტმა, რეჯეპ თაიფ ერდოღანმა რეფერენდუმის დასრულების შემდეგ განაცხადა, რომ შესაძლებელია ქვეყანაში კიდევ ერთი რეფერენდუმი ჩატარდეს - სიკვდილით დასჯის აღდგენის შესახებ. ინფორმაციას „როიტერი“ ავრცელებს.
სტამბოლის ცენტრში სიტყვით გამოსვლისას თურქეთის პრეზიდენტმა აღნიშნა, რომ ის დაუყოვნებლივ განიხილავს ქვეყნის პრემიერ-მინისტრსა და ნაციონალსიტური ოპოზიციის ლიდერთან სიკვდილით დასჯის აღდგენის საკითხს.
აღსანიშნავია, რომ ეს ნაბიჯი საბოლოოდ დაასრულებს მოლაპარაკებას თურქეთის ევროკავშირში გაწევრიანების შესახებ.
თურქეთში საარჩევნო ბიულეტენების 100 %-ია დათვლილი. წინასწარი შედეგებით, საკონსტიტუციო ცვლილებებს რეფერენდუმში მონაწილეთა 51,18 % უჭერს მხარს, 48,82 % კი წინააღმდეგია.
ქვეყნის პრეზიდენტმა, რეჯეფ თაიფ ერდოღანმა უკვე მიმართა მოსახლეობას და რეფერენდუმის შედეგებს ისტორიული უწოდა.
იმ შემთხვევაში, თუ ხმების სრულად დათვლის შემდეგ აღმოჩნდა, რომ რეფერენდუმში მონაწილეთა უმრავლესობამ სარეფერენდუმო შეკითხვას დადებითად უპასუხა, რეჯეფ თაიფ ერდოღანს საშუალება მიეცემა, ქვეყანას 2029 წლამდე უხელმძღვანელოს.
