აშშ-ის პრეზიდენტმა დონალდ ტრამპმა რუსეთის პრეზიდენტ ვლადიმერ პუტინს დაურეკა და სანკტ-პეტერბურგში მომხდარი ფაქტის გამო, მისამძიმრებასთან ერთად, დახმარება შესთავაზა - ამის შესახებ რუსული მედია პუტინის პრესმდივნის დიმიტრი პესკოვის განცხადებაზე დაყრდნობით წერს.
„სატელეფონო საუბარში, ტრამპმა ბარბაროსული ტერორისტული აქტისას გარდაცვლილების ახლობლების მიმართ თანაგრძნობა გამოხატა. მან რუსეთის პრეზიდენტს სთხოვა, რუსი ხალხისათვის მისი მხრიდან მხარდამჭერი სიტყვები გამოეთქვა“, - განაცხადა პესკოვმა.
მედიის ცნობით, სოლიდარობისთვის, რუსეთის პირველმა პირმა ამერიკელ კოლეგას მადლობა გადაუხადა.
ამასთან, Reuters თეთრი სახლის ინფორმაციაზე დაყრდნობით წერს, რომ დონალდ ტრამპმა ტერაქტის გამოძიების საქმეში რუსეთს სრული მხარდაჭერა გამოუცხადა.
3 აპრილს, სანკტ-პეტერბურგის ორ მეტროსადგურს - ტექნოლოგიურ ინსტიტუტსა და „სენნაია პლოშადს“ შორის აფეთქება მოხდა, რის შედეგადაც 11 ადამიანი გარდაიცვალა, 45 კი დაშავდა. პეტერბურგში სამდღიანი გლოვაა გამოცხადებული.
