სირიაში, საერთაშორისო კოალიციის იერიშებისას ბუნდესვერს შესაძლოა შეცდომა დაეშვა. ამის შესახებ "დოიჩე ცაიტუნგი“ გერმანიის შეიარაღებული ძალების წარმომადგენელზე დაყრდნობით იტყობინება. გავრცელებული ინფორმაციით, ბუნდესვერი სავარაუდოდ საერთაშორისო ძალების მიერ წარმოებული ავიაიერიშების დაგეგმვაში იღებდა მონაწილეობას, რომელსაც მშვიდობიან მოსახლეობაში მსხვერპლი მოჰყვა. საუბარია მანსურის რაიონში ყოფილი სკოლის დაბომბვის ფაქტზე. როგორც აღმოჩნდა, სადაზვერვო ფრენის შედეგად მოპოვებული არასწორი მონაცემების გამო შენობაზე იერიში ავიაციამ შეცდომით მიიტანა. დაბომბვას 33 მშვიდობიანი მცხოვრები ემსხვერპლა.
