კატალონიის ყოფილ ლიდერს, არტურ მასას ორი წლით სახელმწიფო სტრუქტურებში მუშაობა აუკრძალეს. ამის მიზეზი 2014 წელს მის მიერ ორგანიზებული რეფერენდუმი გახდა, რომელიც ესპანეთის შემადგენლობიდან გასვლის საკითხზე უნდა ჩატარებულიყო. პარლამენტმა რეფერენდუმის ჩატარებას მხარი დაუჭირა, თუმცა რეგიონალური საკანონმდებლო ორგანოს გადაწყვეტილება საკონსტიტუციო სასამართლომ დაბლოკა. ამის შემდეგ კატალონიაში სიმბოლური კენჭისყრა მაინც ჩატარდა, რომელშიც მონაწილეობა 2 მილიონამდე ადამიანმა მიიღო. მათმა 80-მა პროცენტმა მხარი კატალონიის დამოუკიდებლობას დაუჭირა. არტურ მასამ პოსტი გასული წლის იანვარში დატოვა. კატალონიის უმაღლესი სასამართლოს გადაწყვეტილებით, მასას ჯარიმის სახით 36 ათას 500 ევროს გადახდა მოუწევს.
