საერთაშორისო უფლებადამცველი ორგანიზაცია „ამნესტი ინტერნეშნლი“ იტყობინება, რომ გასამხედროებული ჯგუფები, რომლებიც ერაყში ქვეყნის ჯარებთან ერთად ებრძვიან ექსტრემისტების გაერთიანება „ისლამურ სახელმწიფოს“, სასტიკ დანაშაულებს სჩადიან. ორგანიზაცია ამასთან აცხადებს, რომ ისინი იყენებენ იარაღს, რომელსაც ერაყელი სამხედროები იღებენ, სულ ცოტა, 16 ქვეყნისაგან, მათ შორის აშშ-ის, ევროპის სახელმწიფოების, რუსეთისა და ირანისაგან.

ანგარიშში, ნათქვამია, რომ ერაყში უმეტესწილად შიიტების გასამხედროებულმა ჯგუფებმა იარაღი გამოიყენეს, რათა „ხელი შეეწყოთ ათასობით სუნიტი მამაკაცისა და ბიჭის ძალადობრივი გაქრობისა და გატაცებისთვის, მათი წამებისა და გაუსამართლებლად დახოცვისთვის, ისევე როგორც მათი საკუთრების თვითნებურად განადგურებისთვის“. „ამნესტი ინტერნეშნლი“ მოუწოდებს ქვეყნებს, რომლებისგანაც ერაყი იარაღს ყიდულობს, უზრუნველყონ, რომ გასამხედროებულმა ჯგუფებმა იარაღი არ გამოიყენონ ადამიანის უფლებების დასარღვევად. ,,რადიო თავისუფლების“ ინფორმაციით, ანგარიში დღეს გამოქვეყნდა.