დიპლომატიური პასპორტების მფლობელი გერმანიის მოქალაქეები სტამბოლის აეროპორტში მკაცრ შემოწმებას გადიან. ამის შესახებ თურქული სააგენტო ანადოლუ იტყობინება. გავრცელებული ინფორმაციით, კონტროლის გამკაცრება კიოლნის აეროპორტში მომხდარმა ინციდენტმა განაპირობა. როგორც თურქული მხარე ირწმუნება, პარლამენტის ვიცე-სპიკერი აიშე ნური გერმანულ აეროპორტში 45 წუთი გააჩერეს. უშიშროების სამსახური მისმა დროებითმა პირადობის მოწმობამ დააეჭვა. მოწმობა ნურმა თურქეთის საკონსულოში მას შემდეგ აიღო, რაც ხელჩანთა მოპარეს და დიპლომატიური პასპორტი დაკარგა. ამის გამო მას კიოლნის აეროპორტში პრობლემები შეექმნა, რასაც ოფიციალური ანკარის მხრიდან მწვავე რეაქცია მოჰყვა.
