ამერიკის სახელმწიფო დეპარტამენტი რუსეთს მოუწოდებს, კალინინგრადის ოლქში “ისკანდერისა” და ეს-400-ის ტიპის სარაკეტო კომპლექსები არ განათავსოს. საგანგებო განცხადება სახელმწიფო დეპარტამენტის ოფიციალურმა წარმომადგენელმა ჯონ კირბიმ გააკეთა.
“მოვუწოდებთ რუსეთს, თავი შეიკავოს ისეთი განცხადებებისა და ქმედებებისგან, რომლებიც რეგიონში უსაფრთხოებისა და სტაბილურობის უზრუნველყოფის წინააღმდეგაა მიმართული,“ - აღნიშნა კირბიმ.
მანამდე რუსეთის ფედერაციის საბჭოს თავდაცვისა და უსაფრთხოების კომიტეტის თავმჯდომარემ ვიქტორ ოზეროვმა განაცხადა, რომ ევროპაში ამერიკული ანტისარაკეტო სისტემის განთავსების სანაცვლოდ რუსეთი დასავლეთის მიმართულებით საჰაერო თავდაცვას გააძლიერებს. ახალი გეგმა კალინინგრადში “ისკანდერისა” და ეს-400-ის ტიპის სარაკეტო კომპლექსების განთავსებას, ასევე დასავლეთისა და სამხრეთის სამხედრო ოლქებში ახალი ფორმირებების შექმნას ითვალისწინებს.
