საქართველოს ეროვნული ნაკრების მთავარმა მწვრთნელმა სასტუმრო "ჰუალინგში" პრესკონფერენცია გამართა. ვლადიმირ ვაისმა ირლანდიისა და უელსის ნაკრებებთან ცატარებული მატჩები შეაფასა.
"ვფიქრობ, ორივე თამაშში განსხვავებული ტაიმები ჩავატარეთ. ირლანდიაში პირველ ნახევარში უფრო მეტად ვუტევდით, უელსში კი - მეორე ნახევარში. ეს ყველაფერი მეტოქის სიძლიერიდანაც გამომდინარეობდა. ირლანდიაში რამდენიმე რეალური მომენტი შეგვექმნა, მაგრამ გოლი ვერ გავიტანეთ და ეს არა იღბლის, არამედ ფეხბურთელების კლასის ბრალია. ჩემი აქ ყოფნის პერიოდში ნაკრებმა ყველაზე კარგი თამაში უელსთან მეორე ტაიმში აჩვენა.
ეს ახალგაზრდული გუნდია. ბევრი ფეხბურთელია 23-24 წლისაა. ისინი სწავლობენ და მომავალი კარიერისთვის ემზადებიან. რაც შეეხება ჯანო ანანიძეს, თორნიკე ოქრიაშვილს, ვაკო გვილიას, ოთარ კაკაბაძეს, საბა კვირკველიას, ისინი 1-2 წელიწადში ბევრად უკეთესები და გამოცდილები იქნებიან და ნაკრებს ძალიან გამოადგებიან,"-აღნიშნა ვაისმა.
