მომავალ კვირას უკრაინის, საფრანგეთისა და გერმანიის ლიდერები სატელეფონო კონფერენციას გამართავენ. ამის შესახებ ინფორმაციას უკრაინის პრეზიდენტის პრესსამსახური ავრცელებს. სატელეფონო მოლაპარაკებების გამართვაზე პეტრო პორშენკო და ფრანსუა ოლანდი სატელეფონო საუბრის შედეგად შეთანხმდნენ.
უკრაინელ კოლეგასთან საუბრისას საფრანგეთის პრეზიდენტმა მინსკის შეთანხმებების შესრულების ძალისხმევის გაორმაგების აუცილებლობის შესახებ განაცხადა. ფრანსუა ოლანდი მიიჩნევს, რომ უნდა შემუშავდეს სამოქმედო გეგმა კონფლიქტის მონაწილე ყველა მხარისთვის.
საფრანგეთის პრეზიდენტმა ასევე მზადყოფნა გამოთქვა, რუსეთის პრეზიდენტთან შეხვედრისთვის უკრაინის შეიარაღებული კონფლიქტის დარეგულირების განსახილველად.
"პრეზიდენტმა აღნიშნა, რომ უახლოეს დღეებში მზად იქნბეა, მონაწილეობა მიიღოს "ნორმანდიული ფორმატის" შეხვედრაში, რომელმაც კრიზისიდან გამოსვლას გადამწყვეტი იმპულსი უნდა მისცეს", - განაცხადეს ფრანსუა ოლანდის ადმინისტრაციაში.
