რესპუბლიკური პარტიის ინფორმაციით, დღეს, 24 აგვისტოს, ცენტრალური საარჩევნო კომისია გეგმავს მიკერძოებულად, წილისყრის გარეშე, რიგი პოლიტიკური პარტიებისთვის საარჩევნო ნომრების მინიჭებას.
საქართველოს საარჩევნო კოდექსის 119-ე მუხლი იმპერატიულად ადგენს საარჩევნო სუბიექტისთვის რიგითი ნომრის მინიჭების წესს. კერძოდ, პოლიტიკურ პარტიებს საარჩევნო ნომრები წილისყრით უნდა მიენიჭოთ 2-დან 8 სექტემბრამდე პერიოდში.
„წილისყრის გარეშე რიგითი ნომრის არჩევის უფლება აქვს მხოლოდ იმ სამ პოლიტიკურ სუბიექტს, რომლებმაც წინა საპარლამენტო არჩევნებზე ყველაზე მეტი ხმა მიიღეს. ესაა ერთადერთი გამონაკლისი წილისყრის წესიდან. ყველა დანარჩენი სუბიექტი კანონის თანახმად, თანაბარი უფლებით უნდა მონაწილეობდეს წილისყრაში.
დღეს, საარჩევნო კოდექსის მიხედვით, წილისყრის გარეშე რიგითი ნომრის არჩევის უფლება აქვთ: პარტია ქართულ ოცნებას, ნაციონალურ მოძრაობას და ნინო ბურჯანაძის გაერთიანებულ დემოკრატიულ მოძრაობას. ეს გამონაკლისი ამომწურავია და მისი გაფართოება არ შეიძლება.
შესაბამისად, ცენტრალური საარჩევნო კომისიის განზრახვა - საარჩევნო სუბიექტებს რიგითი ნომერი მიანიჭოს გასული თვითმართველობის არჩევნებისთვის მინიჭებული რიგითი ნომრების მიხედვით, კანონსაწინააღმდეგოა და არათანაბარ მდგომარეობაში აყენებს სხვა საარჩევნო სუბიექტებს, რაც საფრთხეს უქმნის საარჩევნო პროცესის სამართლიანობას და სტაბილურობას. კერძოდ, აღნიშნულ პოლიტიკურ სუბიექტებს შესაძლებლობა ეძლევათ სხვა პარტიებისგან განსხვავებით, რომლებიც წილისყრის პროცესს უნდა დაელოდონ, აწარმოონ წინასაარჩევნო კამპანია საარჩევნო ნომრით“, აღნიშნულია საქართველოს რესპუბლიკური პარტიის განცხადებაში.
პარტიის ინფორმნაციითვე. 2014 წლის ადგილობრივი თვითმმართველობის არჩევნებში მონაწილეობდა 23 პოლიტიკური სუბიექტი.
„იმ შემთხვევაში, თუ ცესკო მიიღებს აღნიშნულ წესს, ადგილობრივ თვითმმართველობაში მონაწილე ყველა პარტიას შეეძლება მოითხოვოს ის რიგითი ნომერი, რომელიც მას ადგილობრივი თვითმმართველობის არჩევნების დროს ქონდა. შესაბამისად, თავდაყირა დგება რიგითი ნომრის განსაზღვრის ლოგიკა, რომლის მიხედვითაც რიგითი ნომრის დადგენისას ამოსავალია საპარლამენტო არჩევნებისთვის განსაზღვრული რიგითი ნომერი.
მოვუწოდებთ ცესკოს, არ მიიღოს კანონთან შეუსაბამო დადგენილება.
მოვუწოდებთ ყველა პოლიტიკურ სუბიექტს და არჩევნებზე დამკვირვებელ საერთაშორისო და ადგილობრივ ორგანიზაციებს, რეაგირების გარეშე არ დატოვონ აღნიშნული ფაქტი“, აცხადებენ პარტიაში.
