თავდაცვის მინისტრი ,,დელტას“ ხელმძღვანელის თანამდებობიდან გათავისუფლებასთან დაკავშირებით აცხადებს, რომ მოკვლევის შემდეგ უჩა ძოძუაშვილი შესაძლოა თანამდებობას დაუბრუნდეს.
..არ მივიჩნევ საჭიროდ, ჩემი დაქვემდებარებაში მყოფი პირების განცხადებებზე კომენტარი ვაკეთო იმასთან დაკავშირებით, მქონდა თუ არა „დელტას“ ხელმძღვანელ უჩა ძოძუაშვილთან კომუნიკაცია, თავდაცვის სამინისტრომ გააკეთა ამ თემაზე განცხადება. ბოლო სამი კვირის განმავლობაში ძალიან ბევრი კითხვა დაისვა და თავდაცვის სამინისტრო არასოდეს არ ყოფილა განზე საზოგადოების მაღალი ინტერესის დაკმაყოფილებისგან. ამიტომ გავავრცელეთ ჩვენ განცხდება ორი დღის წინ. დაიწყო თავდაცვის სამინისტრომ მოკვლევა ამ ინტერესის დასაკმაყოფილებლად, რეალობის საჩვენებლად. გაირკვევა ყველაფერი. ბრძანებაზე ხელი მოწერილია, მაგრამ თუ არაფერი არ გამოვლინდა, შესაბამისად, უჩა ძოძუაშვილი დაბრუნდება სამსახურში“,-აღნიშნა თინა ხიდაშელმა.
სახელმწიფო სამხედრო სამეცნიერო-ტექნიკურ ცენტრ დელტას გენერალური დირექტორი უჩა ძოძუაშვილი თანამდებობიდან გაათავისუფლეს. ინფორმაციას თავდაცვის სამინისტრო ადასტურებს და განმარტავს, რომ გათავისუფლების მიზეზი რამდენიმე დღის წინ, კახეთში მოსული სეტყვის საწინააღმდეგო საშუალებების გამოყენებასთან დაკავშირებული პრობლემები გახდა. თავად ძოძუაშვილი ამ დრომდე არ ადასტურებს მისი გათავისუფლების შესახებ ინფორმაციას.
შეგახსენებთ, ,,ჯი-ეიჩ-ენის" მიერ გასულ დღეებში გავრცელებულ ინფორმაციას, რომლის თანახმადაც, საქართველოს სხვადასხვა რაიონებში მოსული სეტყვის შედეგად, მოსახლეობისთვის მიყენებული მილიონობით ლარის ზარალის თავიდან აცილება ან მინიმალიზირება შესაძლებელი იქნებოდა თავდაცვის სამინისტროს შესაბამის ვადებში რომ მიეცა დაფინანსება სამხედრო სამეცნიერო-ტექნიკური ცენტრ „დელტასთვის“, სეტყვის საწინააღმდეგო დანადგარებს გამართული მუშაობისთვის.
”ჯი-ეიჩ-ენის” ინფორმაციით, ”დელტას” შეფერხება თავდაცვის მინისტრის თინათინ ხიდაშელის ცენტრთან დაპირისპირებამ და კონკრეტულად სეტყვის საწინააღმდეგო დანადგარების არაპრიორიტეტულ მიმართულებად მიჩნევამ განაპირობა.
მართალია, ”დელტაში” საყვედურს თავდაცვის სამინისტროს, მინისტრისა და კურატორი მინისტრის მოადგილის მიმართ ღიად არ გამოთქვამენ, თუმცა ცენტრში ყველასთვის ცნობილია, რომ მის ხელმძღვანელობას აქვს სამინისტროსთან კომუნიკაციის პრობლემა.
კონკრეტულად, სეტყვასაწინააღმდეგო დანადგარის უმოქმედობასთან დაკავშირებით ”ჯი-ეიჩ-ენს” ”დელტაში” განუცხადეს, რომ დანადგარი მწყობრში მაისის ბოლოს იქნება.
სააგენტოს კითხვაზე, რატომ შეხვდა ”დელტა” ასე მოუმზადებელი უამინიდობას, ცენტრში აცხადებენ, რომ მიმდინარეობს ”დანადგარის პროგრამული გადატვირთვის პროცესი”.
”შარშან დანადგარი მუშაობდა სატსეტო რეჟიმში. ჩვენ უცხოეთიდან შემოგვქონდა რაკეტები. წელს თავად დავიწყეთ რაკეტების წარმოება, რამაც აუცილებელი გახადა დანადგარის სრული პროგრამული გადატვირთვა, რაც სავარაუდოდ, მაისის ბოლომდე დასრულდება”, - განუცხადა ”ჯი-ეიჩ-ენს” ”დელტას” საზოგადოებასთან ურთიერთობის სამმართველოს უფროსმა თამარ გვარიშვილმა.
ამავდროულად, ”დელტაში” აცხადებენ, რომ ისინი ინტენსიურად და პროდუქტიულად თანამშრომლობენ სოფლის მეურნეობის სამინისტროსთან და პროცესში მათი მხრიდან ხელისშემშლელ არავითარ ფაქტორს არ ხედავენ.
რაც შეეხება თავდაცვის სამინისტროსთან დაკავშირებულ კითხვებს - დაფინანსების დროულად მიღების ან/და სხვა ხელისშემშლელი ფაქტორების შესახებ - ”დელტაში” კომენტარისგან თავს იკავებენ.
თუმცა ”ჯი-ეიჩ-ენის” ხელთ არსებული ინფორმაციით, სწორედ დაფინასების დაგვიანება და არასათანადო კომუნიკაცია გახდა სეტყვასაწინააღმდეგო დანადგარის მწყობრში შესაბამის ვადებში შესვლის შეფერხებისა და მოსახლეობისთვის მიყენებული მილიონობით ლარის ზარალის მიზეზი.
”ჯი-ეიჩ-ენი” ასევე ფლობს ინფორმაციას, რომ აღნიშნულ საკითხზე ”დელტას” ხელმძღვანელობამ არაერთხელ მიმართა თავდაცვის სამინისტროს და კონკრეტულად მინისტრს, კურატორ მოადგილეს (დ. ებრალიძე), თუმცა ეს საკითხი შესაბამის ვადებში არ იქნა განხილული და დაკმაყოფილებული.
აღნიშნულ საკითხთან დაკავშირებით თავდაცვის სამინისტროში ვალდებულების პირნათლად შესრულებაზე საუბრობენ.
”ჩვენ პირნათლად შევასრულეთ ის, რაც გვთხოვა ”დელტამ”, თანხა გადავურიცხეთ”, განუცხადა ”ჯი-ეიჩ-ენს” სატელეფონო კომენტარში თავდაცვის მინისტრის მრჩეველმა მედიასთან ურთიერთობის საკითხებში, იმედა დარსალიამ.
დამატებით შეკითხვებზე სამინისტრო ოფიციალურ მიმართვას ითხოვს. თუმცა პრობლემა ”ჯი-ეიჩ-ენის” ინფორმაციით, სწორედ იმაში მდგომარეობს, რომ ”დელტას” თანხა დაგვიანებით ჩაერიცხა, რაც გახდა შექმნილი ვითარების მიზეზი.
შეგახსენებთ, რომ სეტყვასაწინააღმდეგო სისტემაზე მუშაობა სსსტც „დელტამ“ 2013 წელს, საქართველოს მთავრობის დაკვეთით დაიწყო. სისტემის, როგორც ელექტრონული, ასევე მექანიკური კომპონენტების უდიდესი ნაწილი სსსტც „დელტას“ საწარმოებში დამზადდა. სისტემის შემადგენლობაში შედის: მართვის ცენტრი თბილისში, ცენტრალური მეტეოროლოგიური რადიოლოკატორი სიღნაღთან და 80 ერთეული სარაკეტო გამშვები დანადგარი მთელი კახეთის მასშტაბით.
სისტემის პირველი სროლები 2015 წლის 28 მაისს განხორციელდა. მთლიანობაში სეზონზე 1000 ერთეულამდე სეტყვასაწინააღმდეგო რაკეტაა გასროლილი.
გასული წლის ზაფხული-შემოდგომის სეზონის განმავლობაში კახეთში 50 სეტყვასაშიში პროცესი განვითარდა, მათგან სისტემამ 47 შემთხვევა სრულიად გაანეიტრალა. საბოლოო შედეგებით, სეტყვასაწინააღმდეგო სისტემამ მიმდინარე წელს 95%-იანი ეფექტიანობა აჩვენა.
სისტემაში გამოყენებული სეტყვასაწინააღმდეგო რაკეტები მსოფლიო სტანდარტების დაცვით არის დამზადებული - ვერცხლის იოდიდის შემცველ რეაგენტს შეიცავს და ეკოლოგიურად სრულიად უსაფრთხოა.
