2016 წლის საპარლამენტო არჩევნებია ერთ-ერთი მთავარი თემა, რაზეც ევროსაბჭოს საპარლამენტო ასამბლეის თანამომხსენებლები საქართველოში ვიზიტის შემდეგ, ერთობლივ განცხადებაში ამახვილებენ ყურადღებას.
ისინი მოუწოდებენ პოლიტიკურ ძალებს და არჩევნების პროცესთან დაკავშირებულ სტრუქტურებს, უარი თქვან ისეთ ქმედებებსა და განცხადებებზე, რომლებიც ნეგატიურ გავლენას მოახდენს არჩევნების დემოკრატიულად ჩატარებასა და მოსახლეობის ნდობაზე არჩევნებისადმი.
თანამომხსენებლები ასევე აქცენტს აკეთებენ იმ ფაქტზე, რომ პოლიტიკური ძალები ვერ შეთანხმდნენ საარჩევნო სისტემის ცვლილების ამოქმედების ვადებზე.
ისინი პოლიტიკურ პარტიებს კომპრომისისკენ მოუწოდებენ, რომ აღარ წამოიჭრას იგივე პრობლემა 2020 წელს არჩევნებამდე დარჩენილ პერიოდში.
განცხადებაში საკონსტიტუციო სასამართლოს შესახებ კანონში შესატან ცვლილებებზეც არის საუბარი. თანამომხსენებლები მიესალმებიან ინიციატივას მეორე მოსმენამდე, კანონპროექტი ვენეციის კომისიას გადაეგზავნოს.
