ევროკომისია მზად არის, თურქეთისთვის სავიზო რეჟიმის გაუქმებას მხარი დაუჭიროს, თუმცა გარკვეული პირობების სანაცვლოდ. ,,ბიბისის“ ინფორმაციით, ევროკომისია თურქეთისთვის სავიზო რეჟიმის გაუქმების საკანონმდებლო წინადადებას 4 მაისს წარადგენს.
,,ჩვეულებრივ ევროკავშირი იმ ქვეყნისგან, რომელსც ევროპასთან უვიზო მიმოსვლა სურს, სიტყვის თავისუფლების პრინციპების დაცვას, სასამართლოს დამოუკიდებლობის უზრუნველყოფას, უმცირესობების უფლებების დაცვასა და ანტიტერორისტული კანონმდებლობის ცვლილებას სთხოვს. ევროკომისია თურქეთთან უვიზო მიმოსვლას მხარს დაუჭერს, თუმცა ანკარასთვის ზემოთ ჩამოთვლილი პირობები ძალაში დარჩება”.
სავიზო რეჟიმის გაუქმება ანკარასა და ბრიუსელს შორის მარტში მიღწეული შეთანხმების ნაწილია, რომლის ფარგლებშიც თურქეთმა თანხმობა განაცხადა, საბერძნეთში არალეგალურად ჩასული მიგრანტები უკან მიიღოს. თითოეული დაბრუნებული მიგრანტის სანაცვლოდ, ევროკავშირი მზად არის მიიღოს თურქეთის მიგრანტთა ბანაკებიდან ერთი სირიელი ლტოლვილი. უფლებადამცველთა ნაწილი ევროკავშირსა და თურქეთს შორის მიღწეულ შეთანხმებას აკრიტიკებს და მის კანონიერებას ეჭვქვეშ აყენებს. მათი თქმით, თურქეთი დეპორტირებული მიგრანტებისთვის უსაფრთხო ქვეყანა არ არის. თუმცა აპრილში ევროკავშირის საბჭოს პრეზიდენტმა დონალდ ტუსკმა განაცხადა, რომ შეთანხმებამ უკვე შედეგები გამოიღო. მან ასევე თურქეთს უწოდა “საუკეთესო მაგალითი იმისა, თუ როგორ უნდა მოექცე ლტოლვილებს”.
თავის მხრივ, თურქეთის პრემიერმა აჰმეთ დავუთოღლუმ განაცხადა, რომ ანკარა მიგრაციული შეთანხმების შესრულებაზე უარს იტყვის, თუ ევროკავშირი თურქეთის მოქალაქეებისთვის სავიზო რეჟიმს ივნისში არ გააუქმებს.
თურქეთის ვიზალიბერალიზაციის სამოქმედო გეგმა 72 კრიტერიუმს შეიცავს.
