ცესკო წყალტუბოში საუბნო საარჩევნო კომისიის წევრების აგიტაციაში შესაძლო მონაწილეობის შესახებ, ენმ-ის მიერ გავრცელებულ განცხადებას პასუხობს:
,,დღეს, ცესკოში შემოვიდა „ერთიანი ნაციონალური მოძრაობის“ წერილი, რომელშიც საუბარია №58 წყალტუბოს საარჩევნო ოლქის, №49 საუბნო საარჩევნო კომისიის წევრების აგიტაციაში შესაძლო მონაწილეობის შესახებ. ამასთან დაკავშირებით, განცხადება გაკეთდა მედიასაშუალებებშიც.
აღნიშნულის შესახებ, ცესკომ უკვე მოახდინა რეაგირება და საკითხი, შემდგომი შესწავლისა და მოკვლევის მიზნით, ცესკოს თავმჯდომარის წერილით რეაგირებისთვის გადაეგზავნა უფლებამოსილ №58 წყალტუბოს საოლქო საარჩევნო კომისიას, ვინაიდან საუბნო საარჩევნო კომისიის წევრების ქმედების შესწავლა კანონმდებლობის შესაბამისად მიეკუთვნება შესაბამისი საოლქო საარჩევნო კომისიის კომპეტენციას.
მოკვლევის შედეგების შესახებ საარჩევნო ადმინისტრაცია დამატებით მიაწვდის ინფორმაციას დაინტერესებულ მხარეებს.
შეგახსენებთ, რომ მიმდინარე წლის 22 მაისს №58 წყალტუბოს მუნიციპალიტეტში (ასევე თბილისის, გარდაბნის, კასპის, ქალაქ ოზურგეთის, ოზურგეთის, ხობისა და ზუგდიდის) საკრებულოების შუალედური არჩევნები ტარდება“, - ნათქვამია განცხადებაში.
