საქართველოს პარლამენტის წევრი, ”ერთიანი ნაციონალური მოძრაობის” ერთ-ერთი ლიდერი, გივი თარგამაძე საქართველოს შინაგან საქმეთა მინისტრის, გიორგი მღებრიშვილის განცხადებას ეხმინება:
"არ დავუშვებ!", "დავიცავ!" რას არ დაუშვებთ? ვის დაიცავთ? თითოეული პოლიციელი დაუცველია და ყველა დაშვებულობა დიდი ხანია, დაშვებულია. ამაზე მაშინ უნდა გეფიქრათ, კრიმინალ-პოლიტპატიმრებს პოლიციელებისთვის თავში რტყმის გამო პასუხი არ მოთხოვეთ; როდესაც იუსტიციის სამინისტროს წინ მკვლელთა ბანდის ძეგლი დადგით; მხეცურად მოკლული 20 წლის პოლიციელის მკვლელი ქურდული დაჯგუფების წევრის საზღვარზე გადაპარების მცდელობაში მონაწილეობა პოლიციელებსვე დაავალეთ; ქუთაისში აშკარა გაუფრთხილებით მკვლელობაზე პოლიციელი განზრახ მკვლელობის მუხლით გაასამართლეთ; სპეცრაზმელები ათასობით დაკითხეთ მუქარითა და შანტაჟით, მოვალეობის შესრულებისთვის ციხეში ჩასვით და სასურველი ჩვენებები დააწერინეთ; სპეცრაზმის ყველაზე ღვაწლმოსილი ხელმძღვანელი გლდანის ციხეში მოათავსეთ, თვითმკვლელობის მცდელობამდე მიიყვანეთ და შემთხვევით გადარჩენილი, ყველა წესის დარღვევით, დღესაც იქ გყავთ; ყველაზე საშიშ და საპასუხისმგებლო უბანზე - ოკუპირებულ ტერიტორიაზე გმირულად მოღვაწე სპეცრაზმელების გვარსახელები გაასაჯაროეთ, რითაც ისინიც და მათი ოჯახის წევრებიც სასიკვდილო საფრთხის წინაშე დააყენეთ, მათი მეთაური კი ბაღაფშის ინტერვიუს საფუძველზე (მტკიცებულებად დევს საქმეში სხვა მტკიცებულებებთან ერთად. რედ) ციხეში გამოამწყვდიეთ; პოსტსაბჭოთა სივრცესა და საერთოდაც, აღმოსავლეთ ევროპაში ყველაზე ეფექტური კონტრდაზვერვის სამსახური დაანგრიეთ, მისი შემქნელი კი რეციდივისტ სახელმწიფო მოღალატეებთან "უხეში მოპყრობისთვის" დღესაც ციხეში გიზით; ხელისუფლების ყველა შტოს უგვანო წარმომადგენელთა კიდევ უფრო უგვანო ნათესავ-მეგობართა მიმართ პროფესიული მოპყრობისა და მოვალეობის პირნათლად შესრულებისათვის ათეულობით პოლიციელი სისტემიდან დაითხოვეთ და სისხლის სამართლის პასუხისგებაში მიეცით; სულ რამოდენიმე დღის წინ პატრულის ორ ხელმძღვანელს პატიოსანი პატრულები, როგორც შევარდნაძის დროს, პროკურატურის სახელით აშანტაჟებინეთ, სამსახურიდან წასვლის განცხადებები დააწერინეთ და ამის მიუხედავად, პროკურატურას მათ მიმართ საქმის აღძვრის საშუალება მიეცით; პოლიციელთა სოციალური მდგომარეობა კატასტროფამდე მიიყვანეთ, სადაზღვევო პაკეტი შეუმცირეთ, პაკეტიდან ოჯახის წევრების დაზღვევა ამოუგდეთ, ხელფასი აღარ გაუზარდეთ და ლარის ვარდნის ფონზე შეურაცხმყოფელ მინიმუმამდე დაუყვანეთ, ამ მინიმუმიდან გაურკვეველ "ობშიაკში" თანხის გაღება აიძულეთ; სამუშაო პირობები აუტანელი გაუხადეთ, ცვლის სისტემა მოშალეთ, არანორმირებული, ხშირად, 24 საათიანი სამუშაო რეჟიმი განუსაზღვრეთ. და ახლა ბედავთ, გულში მჯიღი იცეთ და თავი ქვეშევრდომთა ინტერესების დამცველად წარმოაჩინოთ? ნურას უკაცრავად. ამას არავინ დაგიჯერებთ. ერთი სადღეგრძელოთი ამდენ დანაშაულს ვერ გამოასწორებთ, ნამდვილ მინისტრად თავს ვერ გადაიქცევთ. პოლიციელებს კი მივმართავ: 5 თვეც მოითმინეთ, დებო და ძმებო, პროფესიონალებო, ღირსეულო პატრიოტებო. ოქტომბერში ერთად მოვიშორებთ გლუვტვინიანი ოლიგარქის მარწუხებს, გავანიავებთ შენობებს, დავიბრუნებთ პოლიციელის ღირსებას, მოსახლეობის უმაღლეს ნდობას, საერთაშორისო იმიჯს და კვლავ წინ წავიყვანთ ქვეყანას!”, - აცხადებს გივი თარგამაძე
გიორგი მღებრიშვილის განცხადება იხილეთ ბმულზე: http://www.ghn.ge/com/news/view/152293
