თვითმართველობის შუალედურ არჩევნებზე, ზუგდიდის მუნიციპალიტეტის სოფელ კორცხელის „ქართული ოცნების“ მაჟორიტარი დეპუტატობის კანდიდატი ამირან ლაგვილავა აცხადებს, რომ ის „ერთიანი ნაციონალური მოძრაობის“ წევრობას უარყოფს, - ამის შესახებ ამირან ლაგვილავამ „დაიცავი საქართველოს“ ლიდერის კახა მიქაიას მიერ გაკეთებული განცხადების საპასუხოდ განაცხადა.
„მხარდამჭერი ვიყავი, ღირსების ორდენიც იმიტომ მომცეს, რომ 8 წელი ვემსახურე იმ მთავრობას, თუმცა პარტიის წევრი არ ვყოფილვარ, ხელი არ მომიწერია მსგავს არაფერზე და მით უმეტეს, პარტიიდან გასვლაზე როგორ დავწერდი?“, – აღნიშნა ლაგვილავამ.
კახა მიქაიას ინფორმაციით, ამირან ლაგვილავა დღემდე „ნაციონალური მოძრაობის წევრია. ამ ინფორმაციას ენმ-შიც ადასტურებენ და ამბობენ, რომ ლაგვილავას მათი რიგებიდან გასვლის თაობაზე განცხადება არ დაუწერია.
ამირან ლაგვილავა კანდიდატად სოფელ კორცხელში რამდენიმე დღის წინ კახი კალაძემ წარადგინა.
