ირლანდიაში საქართველოს საელჩოში ევროკომისიის მიერ დაფინანსებული ERASMUS+ პროექტისადმი „მშვიდობის კვლევების კურიკულუმის განვითარება საქართველოში" მიძღვნილი მიღება გაიმართა, რომელსაც საქართველოსა და ირლანდიის უმაღლესი საგანმანათლებლო დაწესებულებების წარმომადგენლები ესწრებოდნენ.
საგარეო უწყების ინფორმაციით, შეკრებილ სტუმრებს მისასალმებელი სიტყვით მიმართა ირლანდიაში საქართველოს საქმეთა დროებითმა რწმუნებულმა გიორგი ზურაბაშვილმა, რომელმაც იმედი გამოთქვა, რომ პროექტი მნიშვნელოვან როლს შეასრულებს საქართველოში მშვიდობის კვლევების მიმართულებით.
აღნიშნული პროექტის კოორდინატორია ქ. დუბლინის უნივერსიტეტი (Dublin City University). მასში ასევე ჩართულია ოთხი ქართული უნივერსიტეტი: ივანე ჯავახიშვილის სახელობის თბილისის სახელმწიფო უნივერსიტეტი, კავკასიის უნივერსიტეტი, ილიას სახელმწიფო უნივერსიტეტი და სოხუმის სახელმწიფო უნივერსიტეტი. ასევე ევროპის წამყვანი უნივერსიტეტები მშვიდობის კვლევების მიმართულებით: დუბლინის ტრინიტის კოლეჯი (ირლანდია), ინსბრუკის უნივერსიტეტი (ავსტრია) და ოლსტერის უნივერსიტეტი (გაერთიანებული სამეფო).
ევროკომისიის მიერ ინსტიტუციური თანამშრომლობის ფარგლებში დაფინანსებული პროექტი, 3 წლის განმავლობაში განხორციელდება. იგი მიზნად ისახავს ევროპელ პარტნიორებთან გამოცდილების გაზიარების შედეგად მშვიდობის კვლევების მიმართულების დაფუძნებას საქართველოს უმაღლეს საგანმანათლებლო დაწესებულებებში.
