23 აპრილს, პარიზში, „ქართველთა კულტურის კერა ლაზი“-ს ორგანიზებით,  „ქართული საღამო“ „Soirée Géorgienne“ გაიმართება. ასოციაცია „ქართველთა კულტურის კერა ლაზი“, რომელიც 2009 წელს დაარსდა, საფრანგეთში ქართული კულტურის პოპულარიზაციის საქმეს ემსახურება. „ლაზში“ ფუნქციონირებს სკოლა, სადაც ნებისმიერი ასაკის მსურველს საშუალება აქვს შეისწავლოს ქართული და ფრანგული ენები და ქართული ხალხური სიმღერა და ცეკვა.

როგორც ორგანიზატორებმა „ჯი-ეიჩ-ენს“ აცნობეს, ყოველი წლის გაზაფხულზე ასოციაცია აწყობს ქართული კულტურის დღესასწაულს პარიზში. წელს ეს დღესასწაული ჩატარდება 23 აპრილს, პარიზის უძველეს უბანში მდებარე „სენ-ჟერმენის აუდიტორიაში“, რომელიც პარიზის მერიის დაქვემდებარებაში მყოფ კულტურულ დაწესებულებას წარმოადგენს. ღონისძიების ფარგლებში გაიმართება გამოფენა „ძველი საქართველო“, სადაც ფართო პუბლიკის წინაშე პირველად იქნება წარმოდგენილი მე-19 საუკუნის ფრანგი მოგზაურების მიერ საქართველოში გადაღებული ფოტოები. გამოფენის შემდეგ კი გაიმართება ქართული ხალხური სიმღერისა და ცეკვის კონცერტი. „ქართული საღამო“-ს მიზანია ფრანგ პუბლიკას გააცნოს ქართული კულტურული მემკვიდრეობა და ის ურთიერთობები, რაც საფრანგეთსა და საქართველოს საუკუნეების მანძილზე აკავშირებთ.

„ქართველთა კულტურის კერა ლაზი“-ს დამფუძნებლები: ეკა ბოდოკია და დაჩი ჩაგანავა

გამოფენის კურატორი: ანა ჭეიშვილი