თურქეთის საგარეო უწყების ხელმძღვანელი მევლუდ ჩავუშოღლუ მიიჩნევს, რომ საქართველოს ნატო- ში მიწვევა MAP-ის გარეშე ტექნიკურად შესაძლებელია. მისი თქმით, საქართველო იმსახურებს ალიანსის წევრობას და აკმაყოფილებს ყველა მოთხოვნას, რათა გახდეს ნატო-ს წევრი.
„ჩვენ სრულად ვუჭერთ მხარს საქართველოს ნატო-ში გაწევრიანებას და ეს არაერთხელ გვითქვამს. მას ვახსენებდით ყველას ნატო-ს ყოველ მინისტერიალზე და ორი წლის წინ უელსის სამიტზეც ვთქვით, რომ ვარშავის სამიტი უნდა იყოს ნატო-ს გაფართოების სამიტი. ახლა ჩვენ მონტენეგრო მოვიწვიეთ. ბოსნია და ჰერცოგოვინა, მაკედონია და საქართველო კი ელოდებიან ჩვენგან ამ მოწვევას. ამ საკითხს წამოვჭრი მაისში, ნატო-ს მინისტერიალის საბჭოზე, ბრიუსელში. რა თქმა უნდა, თურქეთს გარანტიის მიცემა არ შეუძლია, მაგრამ დარწმუნებული ვართ, საქართველო იმსახურებს ალიანსის წევრობას. აკმაყოფილებს ყველა მოთხოვნას და ის უნდა გახდეს ნატო-ს წევრი. მაპის გარეშე ტექნიკურად ეს შესაძლებელია. რატომაც არა?! სავსებით დასაშვებია, რომ საქართველო პირდაპირ მოვიწვიოთ,“ - განაცხადა მევლუდ ჩავუშოღლუ.
ვარშავაში ნატო-ს სამიტი გაიმართება 7-8 ივლისს. მანამდე პოზიციების შეჯერება მოხდება ბრიუსელში. მაისში - საგარეო საქმეთა მინისტრები და ივნისში საბოლოო მოსამზადებელ შეხვედრას გამართავენ თავდაცვის მინისტრები.
