აშშ-ის ვიცე-პრეზიდენტმა ჯოზეფ ბაიდენმა უკრაინის გადამდგარ პრემიერ-მინისტრს არსენი იაცენიუკს ვაშინგტონთან თანამშრომლობისათვის მალდობა გადაუხადა. ამის შესახებ ნათქვამია აშშ-ის საელჩოს მიერ უკრაინული მედიისთვის მიწოდებულ განცხადებაში.
სააგენტო “უნიანის” ცნობით, აშშ-ის ვიცე-პრეზიდენტი ტელეფონით ესაუბრა იაცენიუკს, რომელმაც მას თანამდებობის დატოვების გადაწყვეტილების შესახებ აცნობა. ჯოზეფ ბაიდენმა მადლობა გადაუხადა არსენი იაცენიუკს უკრაინისთვის ისტორიულ პერიოდში აშშ-სთან თანამშრომლობისათვის. ვიცე- პრეზიდენტმა ბოლო ორი წლის განმავლობაში უკრაინის მთავრობის ხელმძღვანელის მუშაობის შედეგები დადებითად შეაფასა. კერძოდ, ბაიდენმა აღნიშნა რთულ, თუმცა აუცილებელ ეკონომიკურ რეფორმებში მიღწეული პროგრესი, ევროკავშირთან ასოცირების შეთანხმების ხელმოწერა და უკრაინის ენერგოდამოუკიდებლობის გაძლიერებისათვის გაწეული სამუშაო. იაცენიუკი და ბაიდენი უკრაინის ახალი მთავრობის ჩამოყალიბების მნიშვნელობაზე შეთანხმდნენ.
