თბილისში, ტექნოლოგიურ პარკში დღეს კანის ახალგაზრდული ფესტივალის შესარჩევი კონკურსი დაიწყო. კონკურსის გახსნის ღონისძიებას საქართველოს ვიცე-პრემიერი, ეკონომიკისა და მდგრადი განვითარების მინისტრი, დიმიტრი ქუმსიშვილი დაესწრო და კონკურსის პირველ მონაწილეებს სიტყვით მიმართა. ვიცე-პრემიერმა კიდევ ერთხელ გამოხატა მხარდაჭერა ამ მნიშვნელოვანი ღონისძიებების მიმართ და იმედი გამოთქვა, რომ საქართველო კანის საერთაშორისო ფესტივალზე წარმატებას მოიპოვებს.
„ეკონომიკა არ ვითარდება მარკეტინგის გარეშე. მარკეტინგში კი ძალიან მნიშვნელოვანია ის კრეატიული იდეები, რომელსაც თქვენ აგენერირებთ. რეალურად, თქვენი მეშვეობით, ადამიანებს უჩნდებათ სურვილი, ცოტა მეტი ფული დახარჯონ, ვიდრე უნდათ. ეს ყველაფერი კი ამოძრავებს ეკონომიკას. საქართველოს სარეკლამო ბაზარი არის ძალიან პატარა, ამიტომ ამოცანა არის არა ამ ბაზრის გადანაწილება, არამედ ბაზრის რეალური გაზრდა ცოდნისა და ნოუჰაუს მეშვეობით, ახალი არხების მოძებნა იმისთვის, რომ გაიზარდოს ადამიანთა ქმედების ხარისხი, მოხდეს მეტი ფულის დახარჯვა და არ მოხდეს არსებულ ბაზარში ჩაკეტვა. კრეატივი გაუთვიცნობიერებელი ადამიანისთვის შეიძლება იყოს რთულად მისაღები, მაგრამ მათთვის, ვინც ყოველდღიურად ამ მიმართულებით მუშაობს, ეს არის რუტინული სამუშაო, რომელიც ითხოვს გონების, სულის, ენერგიის სრულად დახარჯვას და შედეგის მიღებას. ეს არის თქვენი საქმე, ეს არის თქვენგან დამატებითი ღირებულების შეძენა ქვეყნისთვის, თქვენი ოჯახებისთვის და მე მინდა დიდი წარმატებები გისურვოთ“ – განაცხადა დიმიტრი ქუმსიშვილმა კონკურსის მონაწილეებთან შეხვედრისას.
კრეატივის საერთაშორისო ფესტივალის “Cannes Lions”-ის ახალგაზრდულ კონკურსში წელს საქართველო ოთხ კატეგორიაში მიიღებს მონაწილეობას. ყველაზე საუკეთესო ოთხ გუნდს შეარჩევს 30 კაციანი ჟიური, რომელიც დაკომპლექტებულია როგორც ადგილობრივი, ასევე საერთაშორისო პროფესიონალებისგან. ადგილობრივ კონკურსში გამარჯვებული გუნდები 2016 წლის ივნისში კანში საერთაშორისო ფესტივალზე გაემგზავრებიან და შეეცდებიან, გამარჯვება მოუტანონ საკუთარ ქვეყანას.
საქართველოში კანის ახალგაზრდული ფესტივალი წელს ოთხ კატეგორიაში ჩატარდება. ეს კატეგორიებია: ბეჭდური რეკლამა (9 აპრილს), ახალგაზრდა მარკეტერები (10 აპრილს), დიზაინი (16 აპრილს) და ციფრული კამპანიის დაგეგმვა (17 აპრილს).
ფესტივალში მონაწილეობის მსურველთა რეგისტრაცია 2016 წლის 4 აპრილს დასრულდა. საბოლოო ჯამში, დარეგისტრირდა 232 მონაწილე, 33 სარეკლამო სააგენტო და 45 საქართველოს ბაზარზე მოქმედი კომპანია, რომლებიც მარკეტერების კატეგორიაში იღებენ მონაწილეობას. მსგავსი ღონისძიება აქამდე რეგიონის არც ერთ ქვეყანაში არ გამართულა.
კრეატიული ინდუსტრიის განვითარებისთვის საქართველოში საკმაოდ დიდი პოტენციალი არსებობს და ამ პროცესს მაქსიმალურად უწყობს ხელს ინოვაციებისა და ტექნოლოგიების სააგენტო. მნიშვნელოვანია, რომ სახელმწიფოს მხრიდან არის მაქსიმალური თანადგომა იმისთვის, რომ საქართველოს წარმომადგენლებმა შეძლონ საერთაშორისო გამოცდილების გაზიარება და ახალი სიტყვის თქმა მსოფლიოს კრეატიულ ბაზარზე. სწორედ ამიტომ კონკურსში გამარჯვებულები ინოვაციებისა და ტექნოლოგიების სააგენტოს ხელშეწყობით გაემგზავრებიან კანში.
„კანის ლომების“ ფესტივალს 62 წლის ისტორია აქვს. სარეკლამო ფესტივალი მიჩნეულია მსოფლიოში კრეატიულობის ყველაზე დიდ და პრესტიჟულ ჩემპიონატად. მასში მთელი მსოფლიოდან ერთვებიან სარეკლამო კომპანიები და მარკეტინგის სფეროში დასაქმებული ადამიანები. საქართველო ამ მარათონში ორი წლის წინ ჩაერთო - გასულ წელს ქვეყანას საცდელად მიეცა ერთი კატეგორია, წელს კი სრულად, ოთხივე კატეგორიაში ჩართვის უფლება მიენიჭა.
წლევანდელი პროექტის გენერალური მხარდამჭერია საქართველოს ინოვაციების და ტექნოლოგიების სააგენტო, რომლის ხელშეწყობით საქართველო 4 გუნდით (8 ადამიანით) წარსდგება კანის ახალგაზრდულ ფესტივალზე მიმდინარე წლის ივნისის თვეში. პროექტში ჩართულია ქვეყნის ყველა წამყვანი სარეკლამო სააგენტო და დიდი კომპანია.
ღონისძიების ორგანიზატორია „კანის ლომების“ ქართული წარმომადგენლობა, ფესტივალის ოფიციალური მასპინძელია ტექნოპარკი.
