თურქეთის პრეზიდენტმა რეჯეპ ტაიპ ერდოღანმა განაცხადა, რომ ანკარას შეუძლია შეწყვიტოს ევროკავშირთან მიღწეული შეთანხმებები მიგრანტების მიღებასთან დაკავშირებით, თუკი ევროკავშირი საკუთარ ვალდებულებებს არ შეასრულებს. ,,ბიბისის“ ინფორმაციით, ერდოღანმა აღნიშნა, ასევე რომ ევროპამ, მისი მხრიდან, ჯერჯერობით არცერთი დაპირება არ შეასრულა.
4 აპრილს ევროპაში მასობრივი მიგრაციით გამოწვეული კრიზისის შერბილების მიზნით, ევროკავშირისა და თურქეთის გეგმის შესაბამისად, საბერძნეთმა თურქეთში 200-ზე მეტი მიგრანტი გააგზავნა. გეგმის მიხედვით, თურქეთიდან გერმანიასა და ფინეთში 43 სირიელი მიგრანტი ჩაფრინდა.
ევროკავშირისა და თურქეთის გეგმით, ანკარა თავის ტერიტორიაზე მიიღებს ყველა მიგრანტს, მათ შორის სირიელებს, ვინც არალეგალურად ჩავიდა საბერძნეთში. სამაგიეროდ ევროკავშირში თურქეთიდან ჩავა ათასობით სირიელი ლტოლვილი. ეს შეთანხმება ითვალისწინებს თურქეთის ფინანსურ დახმარებას, უვიზო რეჟიმს და წინსვლას ევროკავშირში გაწევრიანების შესახებ მოლაპარაკებისას. ევროკავშირის და თურქეთის ეს შეთანხმება უფლებადამცველების მწვავე კრიტიკას იწვევს.
