უკრაინის პრეზიდენტის პეტრე პოროშენკოს განცხადებით, ჰოლანდიაში გამართული რეფერენდუმის შედეგები, რომელიც უკრაინის ევროკავშირში ასოცირებას შეეხებოდა, არ გახდება დაბრკოლება კიევისთვის ევროპისკენ მიმავალ გზაზე. ამის შესახებ ,,ბიბისი“ პოროშენკოს პრესსამსახურზე დაყრდნობით წერს.
,,მინდა ხაზი გავუსვა, რომ ეს რეფერენდუმი, ჰოლანდიის კონსტიტუციით და კანონმდებლობით, საკონსულტაციო ხასიათს ატარებს. ახლა სიტყვა ხელისუფლებაზე, პარლამენტსა და პოლიტიკოსებზეა. დარწმუნებული ვარ ეს მოვლენა არ წარმოადგენს დაბრკოლებას უკრაინისათვის ევროპულ გზაზე“, - განაცხადა პოროშენკომ.
ჰოლანდიელი ამომრჩევლები უკრაინის ევროკავშირთან ასოცირების შეთანხმებას მხარს არ უჭერენ. რეფერენდუმში მონაწილეობა ამომრჩევლების 32-მა პროცენტმა მიიღო, აქედან 64 უკრაინასთან ასოცირების ხელშეკრულების წინააღმდეგია.
რეფერენდუმი ფორმალურ ხასიათს ატარებდა. თუმცა, ჰოლანდიის საგარეო საქმეთა მინისტრის განცხადებით, უკრაინის ევროკავშირთან ასოცირების რატიფიცირების პროცესი გეგმის მიხედვით ვეღარ გაგრძელდება.
