ახალგაზრდა იურისტთა ასოციაცია პრემიერმინისტრს მიმართავს და მოუწოდებს, რომ არ მოაწეროს ხელი პრეზიდენტის ინიციატივას არჩევნების თარიღთან დაკავშირებით.
საია-ში ამბობენ, რომ ინიციატივა დარღვევებს შეიცავს. კერძოდ, ასოციაციაში ფიქრობენ, რომ თუ პრემიერი დაეთანხმება პრეზიდენტის წინადადებას, სამართლებრივი დოკუმენტი მისი გამოქვეყნებისთანავე შევა ძალაში და არა 8 აგვისტოს, როგორც ეს პრეზიდენტის განკარგულებით არის განსაზღვრული.
იურისტები განმარტავენ, რომ აღნიშნულს საარჩევნო კოდექსი ითვალისწინებს, რომელიც ხშირ შემთხვევებში სხვა კანონების ზემდგომი აქტია.
"აღნიშნული გადაწყვეტილებით იქმნება რისკი, რომ კანონმდებლობის საწინააღმდეგოდ, ხელოვნურად მოხდეს წინასაარჩევნო კამპანიის დაწყების თარიღის გადავადება. ვინაიდან, საქართველოს საარჩევნო კოდექსის თანახმად, წინასაარჩევნო კამპანია იწყება არჩევნების დანიშვნის თაობაზე გამოცემული სამართლებრივი აქტის გამოქვეყნებისთანავე. შესაბამისად, პრეზიდენტის განკარგულების ის ჩანაწერი, რომელიც აქტის ძალაში შესვლის თარიღად განსაზღვრავს 8 აგვისტოს, წინააღმდეგობაში მოდის საარჩევნო კანონმდებლობასთან. კამპანიის დაწყების თარიღის გაურკვევლობას, შეუძლია არსებითად უარყოფითი გავლენა მოახდინოს წინასაარჩევნო გარემოზე,"- ნათქვამია განცხადებაში.
