,,ქართული ოცნების“ კოალიციას რაიმე პოზიტივის მოტანა ქვეყნისთვის არ შეეძლო, - ამის შესახებ „ნაციონალური მოძრაობის“ წევრმა გია ბარამიძემ განაცხადა. მისი განმარტებით, კოალიცია „ქართული ოცნების“ დაშლა მოსალოდნელი იყო, რადგანაც ის მხოლოდ ბიძინა ივანიშვილის ფულის გარშემო იყო გაერთიანებული და მიმართული იყო „ნაციონალური მოძრაობის“ წინააღმდეგ.
„კოალიციის დაშლა მოსალოდნელიც იყო, რადგანაც როგორც ვამბობდით, ეს არის ეკლექტური გაერთიანება მხოლოდ ბიძინა ივანიშვილის ფულის გარშემო და მხოლოდ და მხოლოდ სიძულვილსა და დაპირისპირებაზე დაფუძნებული მიხეილ სააკაშვილისა და „ნაციონალური მოძრაობის“ წინააღმდეგ და ბუნებრივია, ამგვარ კოალიციას არ შეეძლო, რაიმე პოზიტივის მოტანა ჩვენი ქვეყნისთვის, იმიტომ, რომ, როდესაც ერთი პარტია ალთას არის და მეორე ბალთას, ამ ადამიანებს, ასეთ გაერთიანებას არანაირი სიკეთის მოტანა არ შეუძლია ჩვენი ქვეყნისთვის“, - განაცხადა ბარამიძემ.
მისივე თქმით, ამ გუნდს არც ერთიანი ეკონომიკური პროგრამა გააჩნდა და დაპირებების შესრულების ნაცვლად მოსახლეობამ მხოლოდ ტყუილები მიიღო.
„ქვეყანა უკან მიდის ყველა მიმართულებით. ჩვენ ეს არ გვახარებს. „ქართული ოცნება“ ერთ-ერთ ამოცანად მიზნად ისახავდა „ნაციონალური მოძრაობის“ დაშლას და განადგურებას და ვნახეთ, ვინ დაიშალა და ვინ განადგურდა. ეს იმის დასტურია, რომ თუ პარტია არსებობს, პარტია უნდა არსებობდეს იდეის გარშემო, პატრიოტების და კომპეტენტური ადამიანებით დაკომპლექტებული, როგორც ეს „ნაციონალური მოძრაობაა“, რომელმაც ძალიან დიდ ზეწოლას გაუძლო“, - განაცხადა ბარამიძემ.
