საქართველოს პრეზიდენტმა გიორგი მარგველაშვილმა ვაშინგტონში ბირთვულ-ინდუსტრიის სამიტის ფარგლებში გამართული დაჯილდოების ცერემონიაში მიიღო მონაწილეობა, რომელზეც საქართველოს ბირთვულ უსაფრთხოებაში შეტანილი წვლილისათვის ჯილდო - „ატომები მშვიდობისათვის“ გადაეცა.
პრეზიდენტის ადმინისტრაციის ინფორმაციით, საქართველოს დაჯილდოების გადაწყვეტილებაზე განსაკუთრებული გავლენა საქართველოს ინიციატივით მაღალგამდიდრებული ურანის რეპატრიაციის ფაქტმა იქონია.
მაღალგამდიდრებული ურანის რეპატრიაციით ქვეყანამ აღასრულა 2014 წლის ბირთვული უსაფრთხოების სამიტის კომუნიკეში გათვალისწინებული შეთანხმება, შეამციროს საკუთარ ტერიტორიაზე მაღალგამდიდრებული ურანის მარაგი, რის შედეგადაც საქართველომ ბირთვული თვალსაზრისით თავისუფალი სახელმწიფოს სტატუსი მოიპოვა.
დაჯილდოების ცერემონიას საქართველოს დელეგაციის მხრიდან ასევე, ესწრებოდნენ საქართველოს პრეზიდენტის ადმინისტრაციის უფროსი გიორგი აბაშიშვილი, საქართველოს საგარეო საქმეთა მინისტრის მოადგილე დავით ზალკალიანი და გარემოსა და ბუნებრივი რესურსების დაცვის მინისტრის მოადგილე მაია ბითაძე.
ბირთვული ინდუსტრიის სამიტი წარმოადგენს ბირთვული უსაფრთხოების სამიტის პარალელურად მიმდინარე ოფიციალურ ღონისძიებას, სადაც არასახელმწიფო აქტორების მონაწილეობით განიხილება ისეთი მნიშვნელოვანი საკითხები, როგორიცაა: სტრატეგიული ბირთვული და რადიოლოგიური მასალების გამოყენება, შენახვა და ტრანსპორტირება, ასევე, კიბერსაფრთხესთან დაკავშირებული საკითხები. მასში მონაწილეობა მსოფლიოს 40-ზე მეტი სახელმწიფოს წარმომადგენელმა მიიღო. ჯილდო „ატომები მშვიდობისათვის“ 2016 წლის ბირთვული ინდუსტრიის სამიტის ფარგლებში მსოფლიოს 17 სახელმწიფოს გადაეცემა.
