საქართველოს პრემიერ-მინისტრის გიორგი კვირიკაშვილის ოფიციალური ვიზიტი ბელორუსიის რესპუბლიკაში დღეს იწყება. პრემიერ-მინისტრის პრესსამსახურის ინფორმაციით, მინსკში პირველ შეხვედრას გიორგი კვირიკაშვილი პრეზიდენტთან, ალექსანდრ ლუკაშენკოსთან გამართავს.
საქართველოს პრემიერ-მინისტრის დახვედრის ოფიციალური ცერემონია გაიმართება ბელორუსიის მთავრობის სახლში, სადაც გიორგი კვირიკაშვილს უმასპინძლებს ბელორუსიის პრემიერი ანდრეი კობიაკოვი. მათიპირისპირ შეხვედრის შემდეგ გაიმართება საქართველოსა და ბელორუსიის სამთავრობო დელეგაციათა მოლაპარაკება. მინსკში ოფიციალური ვიზიტისას პრემიერ-მინისტრი გიორგი კვირიკაშვილი შეხვდება ბელორუსიის პარლამენტის ხელმძღვანელებს და მონაწილეობას მიიღებს საქართველო-ბელორუსიის ბიზნესფორუმში. საქართველოს სამთავრობო დელეგაციაში არიან ეკონომიკისა და მდგრადი განვითარების მინისტრი, ვიცე-პრემიერი დიმიტრი ქუმსიშვილი და სოფლის მეურნეობის მინისტრი ოთარ დანელია. ბელორუსიაში საქართველოს სამთავრობო დელეგაციის ოფიციალური ვიზიტი 23 მარტს დასრულდება.
