პრემიერ-მინისტრის სპეციალური წარმომადგენლის რუსეთთან ურთიერთობების საკითხებში, ზურაბ აბაშიძის განცხადებით, აბაშიძე-კარასინის ბოლო შეხვედრის შეფასებისას, საქართველოს პრეზიდენტი დაეყრდნო არა ქართული დელეგაციის ინფორმაციას, არამედ რუსულ წყაროებს.
დღეს გამართულ პრესკონფერენციაზე მან განაცხადა, რომ გაოცებული დარჩა, რადგან პრაღაში გამგზავრებამდე, ის პრეზიდენტის მრჩეველს შეხვდა, სადაც ყველა ის საკითხი დასახელდა, რომლის განხილვასაც აპირებდა.
,,ასევე, პრაღიდან დაბრუნებისთანავე, მე დავიწყე შეხვედრები. უპირველეს ყოვლისა, შევხვდი პრემიერს, შევხვდები საგარეო საქმეთა მინისტრს, სხვა უწყებების ხელმძღვანელებს. შევეცდები, უახლოეს მომავალში შევხვდე პრეზიდენტის მრჩეველს და, რა თქმა უნდა, თვითონ პრეზიდენტს, თუ მას ასეთი სურვილი აქვს ან ექნება“, - განაცხადა აბაშიძემ.
მისი თქმით, რუსეთის საგარეო საქმეთა მინისტრის მოადგილის გრიგორი კარასინის განცხადებებზე კომენტირებისას პრეზიდენტი რუსულ წყაროს დაეყრდნო.
,,ძალიან ვწუხვარ, რომ კარასინის ცნობილ განცხადებებზე საუბრისას ბატონი პრეზიდენტი გუშინ დაეყრდნო არა ქართული დელეგაციის ინფორმაციას, არამედ რუსულ წყაროებს. მას ან მის წარმომადგენლებს ჩვენი ინფორმაციისთვის რომ მოესმინათ, მე მათ ავუხსნიდი, რომ როდესაც კარასინმა პრაღაში თავისი ცნობილი განცხადებები გააკეთა შეხვედრის დაწყებამდე, მაშინ მე იმ ადგილას ფიზიკურად არ ვიყავი და ამ განცხადებების შესახებ მოგვიანებით შევიტყვე“, - განაცხადა აბაშიძემ.
მისი თქმით, არ ჰქონდა საშუალება, რუსი კოლეგისთვის მყისიერად გაეცა პასუხი,
რადგან ადგილზე არ იმყოფებოდა. აბაშიძის განცხადებით, კარასინის ადგილზე, ის ასე არ მოიქცეოდა და მსგავსი ტიპის განცხადებების გაკეთებას, კოლეგის თანდასწრებით არჩევდა.
,,თუ რა ვისაუბრე ორმხრივ შეხვედრაზე, რა პასუხი გავეცი მას, ან რა კომენტარი გაკეთდა ჩემი მხრიდან, ეს მოხსენებით ბარათში დეტალურად არის ასახული და სიტყვიერადაც შემეძლო მომეხსენებინა“, - განაცხადა აბაშიძემ.
საქართველოს პრეზიდენტი აბაშიძე-კარასინის ფორმატს აკრიტიკებს და აცხადებს, რომ გრიგორი კარასინს საკადრისი პასუხი უნდა გასცეს ზურაბ აბაშიძემ.
გიორგი მარგველაშვილის თქმით, მისი წარმომადგენელი კარასინს სხვა პასუხს გასცემდა.
,,ბატონმა ზურაბ აბაშიძემ, როგორც მოვისმინეთ, იქ პასუხი არ გასცა. ამასთან, თვითონ აბაშიძის კომენტარი მოვისმინე, რომ, პირიქით, ქართულ მხარეს დაგვარიგა, რომ ჭკვიანად უნდა ვიყოთ. შესაბამისად, მე არ მგონია, რომ პოლემიკაში უნდა შევიდე კარასინთან. პრაღის ფორმატი დასაზუსტებელია, რომ იქ პოლიტიკურ თემატიკაზე, თუ როგორი უნდა იყოს ქართული მხარის რიტორიკა, არ უნდა იყოს საუბარი. თუ ასეთი რამ მოხდება, იქ ამას უნდა ჰყავდეს ადეკვატური პასუხისგამცემი. კარასინს მე ვერ შევცვლი, აბაშიძე ჩემი წარმომადგენელი არ არის, პრემიერმინისტრისაა. მე რომ მყავდეს წარმომადგენელი, ის სხვა ტიპის პასუხს გასცემდა», - განაცხადა პრეზიდენტმა საზოგადოებრივი მაუწყებლის ეთერში.
რუსეთის საგარეო საქმეთა მინისტრმა გრიგორი კარასინმა, პრაღაში რუსეთ-საქართველოს შორის კარასინ- ბაშიძის ფორმატში ბოლო მოლაპარაკებების დაწყებამდე განაცხადა, რომ საქართველოს თავდაცვის მინისტრის განცხადებები არ არის საპატიებელი, ხოლო მთავარი საფრთხე საქართველოსში მოსალოდნელი საპარლამენტოი არჩევნებია.
„ახლა მთავარი საფრთხე არის საპარლამენტო არჩევნები და ამ კუთხით საქართველოში გაზრდილი პროვოკაციული ანტირუსული განცხადებები ხელისუფლების მხრიდან და პრეზიდენტისგანაც კი. ახლა ვდგავართ წყალგამყოფის წინაშე, ან ვუბრუნდებით კონფრონტაციის პერიოდს ან დავალაგებთ ურთიერთობებს. თავდაცვის მინისტრი მოუწოდებს მსოფლიოს რუსეთის საფრთხის წინაშე გაერთიანებას, ასეთი განცხადებები არაა საპატიებელი, ჩვენ ჯერ თავს ვიკავებთ, მაგრამ ვშიშობ, რომ ჩვენს მოთმინებასაც აქვს საზღვარი”, - განაცხადა კარასინმა.
