ომბუდსმენი თსუ-ში დაცვისა და პოლიციის არაეფექტურ მუშაობაზე და აუდიტორია 115-ის სტუდენტების უფლებების შეზღუდვაზე მიუთითებს.
14 მარტის მსგავსად, 15 მარტს საქართველოს სახალხო დამცველის წარმომადგენლები როგორც დღის, ასევე ღამის განმავლობაში აკვირდებოდნენ თბილისის სახელმწიფო უნივერსიტეტში აუდიტორია 115–ისა და თსუ–ს თვითმმართველობის მიერ გამართული პარალელური აქციების მიმდინარეობასა და მის შემდეგ განვითარებულ მოვლენებს.
“კვლავ გამოიკვეთა თსუ–ს დაცვის სამსახურისა და პოლიციის არაეფექტური მუშაობის პრობლემა. აღნიშნულიდან გამომდინარე, სახალხო დამცველი მიმართავს შინაგან საქმეთა სამინისტროს, იმოქმედოს მისთვის დაკისრებული პასუხისმგებლობის შესაბამისად, აქციის მონაწილეთა უფლებების სრული დაცვით.
გავრცელებული მასალები მიუთითებს, რომ 15 მარტს უნივერსიტეტის შენობასა და რექტორის კაბინეტში ძალის გამოყენებით შეიჭრნენ თსუ–ს თვითმმართველობის მომხრე სტუდენტები. აღნიშნული ინციდენტების დროს პოლიციისა და დაცვის სამსახურის მუშაობა არ იყო ეფექტური და მათ ვერ შეძლეს მისი თავიდან აცილება. ამ დროისათვის რექტორის კაბინეტი არ არის დაკავებული თსუ–ს თვითმმართველობის მომხრე სტუდენტების მიერ. გუშინდელი დღის განმავლობაში კვლავ ბუნდოვანი რჩებოდა შენობაში შესვლა–გამოსვლის რეჟიმი. მიუხედავად იმისა, რომ პოლიციელთა განმარტებით შენობაში შესვლა შეზღუდული იყო, პერიოდულად ვრცელდებოდა ინფორმაცია უნივერსიტეტში სხვადასხვა ჯგუფების (მათ შორის, სხვა სახელმწიფო უნივერსიტეტების თვითმმართველობების წარმომადგენლების) შემოსვლის შესახებ მაშინ, როდესაც აუდიტორია 115–ის სტუდენტებს უარს ეუბნებოდნენ სტუდენტების ჩანაცვლებაზე, რაც ქმნიდა მათი შეკრების თავისუფლების შეზღუდვის რისკებს.
მოგვიანებით, გვიან ღამით, აუდიტორია 115–ის სტუდენტებს მიეცათ შენობაში შემოსვლის შესაძლებლობა. საქართველოს სახალხო დამცველის წარმომადგენლებს გამოცემა „17 მაისის“ ჟურნალისტმა ვახტანგ კვარაცხელიამ მიაწოდა ინფორმაცია იმასთან დაკავშირებით, რომ თსუ–ს თვითმმართველობის მომხრე პირებმა მას არ მისცეს ფოტოგადაღების საშუალება, დაემუქრნენ და გარკვეული პერიოდის განმავლობაში მისი, როგორც ჟურნალისტის მაიდენტიფიცირებელ ბარათს არ უბრუნებდნენ. ვახტანგ კვარაცხელიას განმარტებით, იქვე მყოფმა პოლიციელებმა ფაქტზე რეაგირება არ მოახდინეს. აღნიშნული შემთხვევები საჭიროებს დაინტერესებას და დროულ რეაგირებას სამართალდამცავი ორგანოების მხრიდან.
უნივერსიტეტის გასასვლელებს თსუ–ს დაცვის სამსახურთან ერთად შსს–ს სხვადასხვა ქვედანაყოფები აკონტროლებდნენ. სახალხო დამცველის წარმომადგენლებმა რამდენიმე გასასვლელთან ვერ ნახეს ხელმძღვანელი პირები, იქ მყოფი სამართალდამცავები კი უარს აცხადებდნენ ინფორმაციის მოწოდებაზე.
ხელმძღვანელთა იდენტიფიცირება ზოგიერთ შემთხვევაში საერთოდ შეუძლებელი იყო, ვინაიდან ეცვათ სამოქალაქო ტანსაცმელი, რაიმე ამოსაცნობი ნიშნის გარეშე. ადგილზე იგრძნობოდა შსს–ს სხვადასხვა სამსახურებს შორის კოორდინირების ნაკლებობა. ცალკეული ინციდენტების შესწავლისას გამოვლინდა, რომ თსუ–ს დაცვის სამსახური პოლიციელებს მიაწერდა ცალკეულ გადაწყვეტილებებსა და ქმედებებს, ხოლო პოლიცია პირიქით, იმავე გადაწყვეტილებებზე/ქმედებებზე მიუთითებდა, რომ თსუ–ს დაცვის სამსახურის განხორციელებული იყო. სამწუხაროა, რომ უმრავლეს შემთხვევებში სამართალდამცავები ინფორმაციას არ აწვდიდნენ სახალხო დამცველის წარმომადგენლებს, არ იყვნენ ინფორმირებულები სახალხო დამცველის უფლებამოსილებისა და მის საპასუხოდ მათთვის დაკისრებული მოვალეობების შესახებ.
მოვუწოდებ შინაგან საქმეთა მინისტრს, დაუყოვნებლივ უზრუნველყოს ზომების მიღება აღნიშნული მასშტაბური პრობლემის მოსაგვარებლად.
მისასალმებელია საქართველოს განათლებისა და მეცნიერების სამინისტროს მზაობა სტუდენტების მოთხოვნის საპასუხოდ დაიწყოს მუშაობა თვითმმართველობისა და ზოგადად, უმაღლესი განათლების სისტემის რეფორმაზე, ასევე, გადადგას კონკრეტული ნაბიჯები ე.წ. „ოდეერების“ თბილისის სახელმწიფო უნივერსიტეტში მუშაობასთან დაკავშირებით გავრცელებულ ინფორმაციაზე რეაგირების მიმართულებით.
მნიშვნელოვანია აღნიშნული საკითხების გადასაჭრელად დროულად გატარდეს ეფექტური და შედეგზე ორიენტირებული ღონისძიებები. სახალხო დამცველის აპარატი აგრძელებს პროცესებზე დაკვირვებას”,-აღნიშნულია განცხადებაში.
